Синай яримороли шимолида жойлашган Бир ал-Обод шаҳарчасидаги масжидга жангарилар жума намози вақтида ҳужум қилди. Улар бешта йўлтанламасда келиб, бинони қуршаб олган. Расмий маълумотларга кўра, террорчилар 25—30 киши атрофида бўлган, улар ҳарбийча кийинган, баъзиларининг юзида ниқоблари ҳам бор эди. Прокуратура баёнотига кўра, жангариларнинг ёнида ИШИД террорчилик ташкилоти байроғи бўлган.
«Аллоҳу акбар!» деб бақирган террорчилар автоматлар ва гранатомётлардан ўқ ёғдиришни бошлаган, деб ёзади Meduza. Хабар беришларича, улар портлаш ҳам уюштирган ҳамда масжиддан қочиб чиқаётган одамларга халал бериш учун бино ёнидаги машиналарни ёқиб юборган. Масжид ташрифчилари уни деразалар орқали тарк этишга ҳаракат қилган, тиқилинч юзага келган. Омон қолганларнинг сўзларига кўра, ҳаммаси тахминан 20 дақиқача давом этган — улардан бири, 38 ёшли Эбид Салим Мансурнинг айтишича, жиноятчилар аввалига «жазава билан» ҳаракат қилган, сўнг ким тирик қолган бўлса, барини бирма-бир, тартиб билан ўлдиришга киришган. Аксарият одамлар бошини қуйи туширган кўйи ерда ётган. Тасдиқланмаган маълумотларга кўра, террорчилар ярадорларни олиб кетишга келган тез ёрдам машиналарини ҳам ўққа тутган.
Ушбу ҳужум Миср янги тарихидаги энг йирик терактга айланди — ушбу шарҳ тайёрланаётган вақтда 305 киши ҳалок бўлгани (улардан 27 нафари болалар), яна 128 киши тан жароҳати олгани маълум эди. Al Arabia телеканалида ҳодисага баҳо берган экспертлардан бири бу ҳужумни «Миср 11 сентябри» деб атади. Кўпчиликнинг қайд этишича, Мисрдаги радикал ақидапарастлар нишон сифатида ҳуқуқ-тартибот органлари ходимлари ёки копт насронийларидан фойдаланарди, лекин оддий мусулмонларга ҳужум қилмасди. Мамлакатда уч кунлик мотам эълон қилинган; президент Абдулфаттоҳ ас-Сисий ҳалок бўлганлар хотираси учун ёдгорлик мажмуаси қуриш ҳақида кўрсатма берган.
Миср армияси ҳужум қилганларнинг камида бир қисми йўқ қилинганини маълум қилди. Мамлакат ҳарбий авиацияси ичида, тахминларга кўра, террорчилар бўлган машиналарга зарба берган. Машиналар ичида бўлганларнинг бари йўқ қилинган. Associated Press’нинг қайд этишича, ҳарбийлар баёнотини текшириб кўриш имкони йўқ, чунки Синай яриморолида ОАВ фаолияти чекланган.
Ҳужум учун жавобгарликни ҳеч ким ўз зиммасига олганича йўқ, лекин, катта этимол билан, унга ИШИДнинг маҳаллий бўлинмаси алоқадор. Буни, террорчилар ёнида ИШИД байроғи бўлганидан ташқари, ҳужум объекти сифатида Мисрда кенг тарқалган оқимлардан бири — сўфийларнинг масжиди танлангани ҳам қисман тасдиқлайди. Диний ақидапарастлар сўфийларни бидъатчи деб ҳисоблайди, ИШИДнинг Синайдаги тарафдорлари яриморолни улардан тозалашга бир неча бор ваъда берган. 2016 йил кузида улар сўфийларнинг 100 ёшли шайхи — Сулаймон Абу Харазнинг бошини танасидан жудо қилган эди; ИШИД тарафдорлари Харазни жодугар деб ҳисоблаган.
Миср ҳукумати кўп йиллардан бери Синайдаги диний ақидапарастларга қарши кураш олиб бормоқда. 2013 йил ёзида, Абдулфаттоҳ ас-Сисий бошчилигидаги ҳарбийлар «Мусулмон биродарлар» билан яқин муносабатдаги президент Муҳаммад Мурсийни ағдарганидан сўнг, низо янада чуқурлашди — жангарилар ҳукумат ҳарбийлари ва полициячиларга мунтазам равишда ҳужум қилишни бошлади. 2014 йилда «Ансор байт ал-Мақдис» гуруҳи террорчилари ИШИД етакчисига содиқлик ҳақида қасамёд қилиб, ўз номини «Вилоят Синай» (яъни, ИШИДнинг «Синай вилояти») деб ўзгартирди. 2015 йил 31 октябрида мазкур гуруҳ Шарм-аш-Шайхдан Санкт-Петербургга учаётган Россия самолётини қулатган эди. Самолёт бортида бўлган 224 кишининг бари ҳалок бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)