Ўзбекистон Президенти Шавкат Мирзиёев президент Мун Чжэ Иннинг таклифига биноан 22 ноябрь куни давлат ташрифи билан Жанубий Кореяга келди. Бу ҳақда ЎзА хабар бермоқда.
Сеул халқаро аэропортида Ўзбекистон Президенти шарафига икки давлат байроқлари кўтарилди, фахрий қоровул саф тортди. Давлат раҳбарини Жанубий Кореянинг расмий шахслари кутиб олди. Маросимдан сўнг Ўзбекистон делегацияси ўзи учун ажратилган қароргоҳга йўл олди.
Олий даражадаги музокараларда ўзаро ҳамкорликнинг кенг кўламли масалалари, сиёсий, савдо-иқтисодий, молиявий-сармоявий, илмий-техникавий, маданий-гуманитар ва бошқа соҳалардаги давлатлараро алоқаларни янада ривожлантириш истиқболларини муҳокама қилиш, минтақавий ва халқаро муаммолар юзасидан фикр алмашиш кўзда тутилган.
Аввал хабар қилинганидек, ташриф доирасида давлат раҳбари Миллий ассамблея спикери Чон Се Гюн ва Жанубий Корея бош вазири Ли Нак Ён билан учрашиши, икки давлатнинг етакчи иқтисодий ва молиявий тузилмалари раҳбарлари, йирик ишбилармонлар иштирокидаги Ўзбекистон — Жанубий Корея бизнес форумида иштирок этиши кўзда тутилган.
Ташриф якунлари бўйича Ўзбекистон ва Жанубий Корея Президентларининг Стратегик шерикликни ҳар томонлама ривожлантириш тўғрисидаги қўшма баёноти қабул қилиниши, шунингдек, турли соҳалардаги ўзаро манфаатли ҳамкорликни мустаҳкамлаш ва кенгайтиришга доир кўплаб ҳукуматлараро ва идоралараро ҳужжатлар, тижорат келишувлари ва шартномалари имзоланиши кутилмоқда.
Изоҳ (0)