Бутунжаҳон соғлиқни сақлаш ташкилоти антибиотиклардан фойдаланишда мутахассислар билан маслаҳатлашиш тавсия қилди

13—19 ноябрь кунлари Бутундунё антибиотиклардан тўғри фойдаланиш ҳафталиги бўлиб ўтди. Бу ҳақда «Газета.uz» хабар бермоқда.

Жорий йилги ҳафталикка «Антибиотикларни қабул қилиб олишдан олдин малакали мутахассислар билан маслаҳатлашинг» деган шиор мавзу сифатида танлаб олинди.

Бутун дунёда антибиотикларга бардошлилик таҳдид соладиган даражада ошиб бормоқда. Уларнинг самарадорлиги камайгани сари даволаш қийин, баъзан эса имконсиз бўлган инфекциялар, жумладан, пневмония, сил, қон заҳарланиши, гонорея, озиқ-овқат истеъмоли билан боғлиқ касалликлар сони ортиб бормоқда.

Антибиотикларга бардошлилик улардан нотўғри ва ўта кўп фойдаланиш, шунингдек, инфекцияларга қарши кураш ва уларнинг профилактикаси  заифлиги сабабли кучайди. Бутунжаҳон соғлиқни сақлаш ташкилоти бунинг олдини олиш учун қуйидагиларни тавсия қилади:

Антибиотикларни фақат малакали тиббиёт ходими кўрсатмаси билан қабул қилиш;

Тиббиёт ходими бунга ҳожат йўқлигини билдирган тақдирда антибиотикларни талаб қилмаслик;

Антибиотикларни қабул қилиш чоғида шифокор тавсияларига амал қилиш;

Ўз антибиотикларини ҳеч қачон бошқа шахсларга бермаслик ва қолган антибиотиклардан фойдаланмаслик;

Хавфсиз таомланиш ва гигиена тамойилларига амал қилиш, ўз вақтида эмланиш.