«Ўзсаноатқурилишбанк» ва Commerzbank AG ҳамкорлиги кўп йиллик тарихга эга. Ҳамкорликка Commerzbank AG’нинг 200 миллион АҚШ доллари миқдоридаги маблағи эвазига «Шўртан» ГКК қурилиши молиялаштирилган ва унга 1997 йилда асос солинган.
Дастлаб 1999 йилда Европа Иттифоқи мамлакатлари Экспорт-кредит агентликлари суғуртасини қоплаш асносида Европа ускунасини харид қилишни молиялаштириш учун 25 миллион АҚШ доллари миқдорида кредит линияси жалб этилиб, савдони молиялаштириш операциялари учун 10 миллион АҚШ доллари миқдорида лимит ажратилган эди.
Ушбу ҳамкорлик кўлами йилдан йилга кенгайиб бормоқда, натижада 2016 йил якунига келиб кредит линияси суммаси миқдори 150 миллион еврогача кўпайтирилди.
Ўзбекистон—Германия ҳамкорлиги натижасида тузилган банклараро битимлар доирасида умумий қиймати 28,2 миллион еврога тенг 15 та лойиҳа молиялаштирилди.
Бундан ташқари, Commerzbank ва «Кредит Суис» (Швейцария) банклари консорциуми билан ҳамкорликда умумий қиймати 115,6 миллион АҚШ долларига тенг «Навоийазот» АЖда азот кислотаси ишлаб чиқаришни ташкил этиш лойиҳаси амалга оширилмоқда.
Ўзбекистон бош вазири Абдулла Орипов бошчилигидаги Ҳукумат делегациясининг 2017 йил 14—16 ноябрь кунлари Германияга ташрифи ҳамда Мюнхен шаҳрида бўлиб ўтган Ўзбекистон—Германия бизнес-форуми доирасида икки мамлакат ўртасида ҳамкорликни янада кенгайтириш мақсадида «Ўзсаноатқурилишбанк» ва Commerzbank Ўзбекистонда амалга оширилаётган сармоявий лойиҳаларни молиялаштиришни таъминлаш учун мавжуд кредит линияси миқдорини 200 миллион еврогача кўпайтириш ҳақида қўшимча келишувни имзоланди.
Реклама ҳуқуқи асосида
Изоҳ (0)