Президент Шавкат Мирзиёев 8 ноябрь куни Ўзбекистонга амалий ташриф билан келган Россиянинг Санкт-Петербург шаҳри губернатори Георгий Полтавченкони қабул қилди. Бу ҳақда ЎзА хабар бермоқда.
Шавкат Мирзиёев меҳмонни қутлар экан, 2017 йилда бўлиб ўтган олий даражадаги самарали учрашувлар ва уларнинг якунлари бўйича эришилган келишувлар, жумладан, апрель ойида имзоланган икки мамлакат минтақалари ўртасида ҳамкорлик тўғрисида ҳукуматлараро битим Ўзбекистон ҳудудлари ва Россия субъектларининг амалий ҳамкорлигини, аввало, савдо-иқтисодий ва маданий-гуманитар соҳалардаги алоқаларни фаоллаштиришга хизмат қилганини мамнуният билан қайд этди.
«Учрашувда Ўзбекистон ва Санкт-Петербург шаҳри ўртасидаги анъанавий яқин ва ўзаро манфаатли муносабатларни янада кенгайтириш ва мустаҳкамлаш масалалари кўриб чиқилди. Ўзаро савдо ҳажмини ошириш ва етакчи корхоналар ўртасида кооперацияни кенгайтириш учун мавжуд салоҳиятдан самарали фойдаланиш зарурлиги қайд этилди», — дейилади ЎзА ахборотида.
Соғлиқни сақлаш, таълим ва туризм соҳаларида қўшма дастур ва лойиҳаларни амалга оширишга алоҳида эътибор қаратилди.Санкт-Петербург шаҳри губернатори Георгий Полтавченко Президент Шавкат Мирзиёевга самимий қабул учун чуқур миннатдорлик билдирган. «Ўзбекистон билан устувор йўналишларда кенг кўламли ҳамкорликни ривожлантиришдан манфаатдор эканини таъкидлади», — деб ёзади ЎзА.
Изоҳ (0)