Буюк Британияда уруш йиллари мингдан ортиқ яҳудийни қутқариб қолган Оскар Шиндлерга ёзилган миннатдорлик мактублари сотувга қўйилди

Германиялик тадбиркор ва гуманист Оскар Шиндлерга (1908–1974) ёзилган 70 дан ортиқ миннатдорлик мактуби аукционга қўйилди. Бу ҳақда «ТАСС» хабар бермоқда.

Оскар Шиндлер Иккинчи жаҳон уруши йиллари Гитлер партияси аъзоси бўлган ҳамда армия билан ҳамкорликда тижорат юритган, аммо, нацистларнинг ваҳшийликларига гувоҳ бўлгач, қарашларини ўзгартирган ва ўз заводида мингдан ортиқ яҳудийни концентрацион лагерлардан қутқариб қолган.

Сотувлар Англия жануби-ғарбидаги Сомерсет графлигида 8 декабрь куни бўлиб ўтади.

Lawrences Auctioneers аукцион уйи мактублар тўпламини 793 еврога, тижоратчининг тилла соатини эса 680 долларга баҳолади. Кимошди савдосига қўйилган бошқа лотлар қаторида Оскар Шиндлерга тегишли буюмлар — ликопча, мусиқали соат ва унинг ўзи фотосурати бор.

Тўпламга Шиндлерга унинг томонидан қутқариб қолинган яҳудийлар ёзган миннатдорлик хатлари кирган. 1949 йили Шиндлерлар жуфтлиги Аргентинага кўчиб кетган эди. Мактублар ўша ерга йўлланган.

Стивен Спилберг томонидан бу шахс ҳақида «Шиндлер рўйхати» номли фильм суратга олинган.