Бангладешлик рикша ҳайдовчиси Ижажул Миа «Сиёсатчилар» фильми режиссёри ва продюсери, актёр Шакиб Хонни фильмида унинг телефон рақамидан фойдаланганлиги учун судга берди. Бу ҳақда TJournal хабар бермоқда.
Мианинг сўзларига кўра, у Шакиб Хоннинг мухлисларидан юзлаб қўнғироқларни қабул қилган, бу ҳолат эса унинг ҳаётини остин-устун қилган.
«Сиёсатчилар» фильми июнь ойида намойиш этилган эди. Унинг сюжети бўйича Хон ижро этган персонаж севган қизига телефон рақамини беради, бу рақам эса Миага тегишли бўлиб чиқди.
Ўшандан бери мухлислар Хон билан гаплашиш мақсадида Миага тинимсиз қўнғироқ қилган. Ҳатто мухлисалардан бири унинг қаерда яшашини аниқлаб, у билан учрашиш учун 500 километр йўл босиб келган.
Мианинг айтишича, унинг рафиқаси бу ҳолатдан дарғазаб бўлган ва ажрашиш билан таҳдид қилган. Миа эса телефон рақамини ўзгартира олмайди, чунки унинг барча мижозлари шу рақам орқали мурожаат қилади.
Ҳайдовчининг рақами фильмга қандай тушиб қолгани эса тушунарсиз.
Миа фильм муаллифларини 29 октябрь куни судга берган. У товон пули сифатида 60,9 минг доллар олишни режалаштирмоқда.
Изоҳ (0)