Шавкат Мирзиёев 30 июль куни мева-сабзавот ва озиқ-овқат экспортини кўпайтириш масалаларига бағишланган видеоселектор йиғилишида хом мевани экспортга чиқараётган тадбиркорларни танқид қилди. Бу ҳақда Президент матбуот хизмати хабар қилди.
“Маҳсулотларимиз сифатли ва ширин бўлгани учун ташқи бозорларда ‘Ўзбекистонда етиштирилган’ бренди шаклланган”, деди давлат раҳбари. Лекин айрим “чаққон” савдогарлар ҳаммадан олдин қимматроқ сотишни кўзлаб, хом мевани экспортга чиқараётганини танқид қилди.
Оқибатда хориждаги савдо тармоқлари минглаб тонна Ўзбекистон маҳсулотини хом ҳолатда етказиб берилгани учун қабул қилмаган. Президент бунинг натижасида Ўзбекистонда етиштирилган маҳсулотлар ташқи бозорда ўз ўрнини йўқотиши мумкинлигини қатъий кўрсатиб ўтди.
Шавкат Мирзиёев 21 та туманда экспорт ўтган йилга нисбатан 70 фоизга ҳам етмаганини ҳам айтди. Ваҳоланки, бу туманларда 80 минг гектар пахта ва ғалла экилмайдиган майдон, яна 55 минг гектар томорқа ери бор. Ушбу 21 та туман ҳокимига вилоят ҳокимлари билан биргаликда бу борада ўзгариш қилиш бўйича аниқ режаларни тузиш топширилди.
Президент хориждаги элчихона ва бош консулхоналарни экспортни кўпайтиришга фаолроқ кўмаклашишга чақирди.
Бу йилги мева-сабзавот экспортининг 80 фоизи 5 та давлатга — Россия, Покистон, Қозоғистон, Афғонистон ва Хитойга тўғри келади. Ўтган йилга нисбатан Жанубий Корея, Венгрия, Малайзия, Польша, Қозоғистонга камайган. Буюк Британия, Италия, Швеция, Япония, Ҳиндистон, Қатарга экспорт кутилганидек бўлмаётгани кўрсатиб ўтилди.
Элчихоналардаги савдо маслаҳатчиларининг бу борадаги фаолияти суст экани қайд этилди. Уларга экспортчи корхоналар билан бирга ишлаб, уларга бозор топиш, кўргазмалар ташкил қилиш, савдо уйи ва омбор ташкил қилиш, маҳсулотига сертификат олиш каби масалаларда кўмаклашиш топширилди.
Изоҳ (0)