Камчаткада 30 июль куни юз берган зилзиладан сўнг Ўзбекистоннинг Владивосток шаҳридаги бош консули Юсуп Кабулжанов Россиянинг Узоқ шарқий федерал округида бўлиб турган ўзбекистонликларга мурожаат билан чиқди.
“Бош консулхона Камчатка ўлкаси ва Сахалин вилояти ҳудудида вақтинча бўлиб турган Ўзбекистон фуқароларини фавқулодда вазиятлар хизматлари кўрсатмаларига риоя қилишга ва хотиржамликни сақлашга чақиради”, дейилади мурожаатда.
Камчатка Соғлиқни сақлаш бошқармаси берган маълумотга кўра, зилзила вақтида жабрланган фуқаролар шифокорлар назоратида, барча беморларга зарур ёрдам кўрсатилмоқда, жиддий жароҳатланганлар қайд этилмаган. Жабрланганлар орасида Ўзбекистон фуқаролари йўқ.
Россия Фавқулодда вазиятлар вазирлиги цунами хавфи сабаб Камчатка ўлкаси ва Сахалин вилояти қирғоқларидаги аҳолига юқорироқ ҳудудларга чиқишни ва сувга яқинлашмасликни тавсия қилмоқда.
Юсуп Кабулжанов зарурат туғилса, фуқаролар Ўзбекистоннинг Владивостокдаги Бош консулхонасига қуйидаги рақамлар орқали мурожаат қилишлари мумкинлигини билдирди:
- +7 (423) 260-48-00
- +7 (902) 078-70-07.
Россиянинг Камчатка ўлкаси қирғоқларига яқин жойда жойлашган Тинч океанида кучли зилзила 30 июнь куни юз берди. Дастлабки маълумотларга кўра, ер силкиниши магнитудаси 8,7 баллни ташкил этиб, 1952 йилдан кейин Камчатка ўлкасида содир бўлган ер силкинишлари орасида энг каттаси ҳисобланади. Ушбу зилзила ер юзида қайд этилган кучли зилзилалар қаторига кириб, олтинчи ўринни эгаллади.
Камчатка ўлкаси губернатори Владимир Солодов фуқароларга қирғоқ ҳудудларидан йироқ бўлишни, оммавий ахборот воситалари ва овоз кучайтиргичлар орқали эълон қилинаётган огоҳлантиришларга амал қилишни тавсия қилмоқда.
Изоҳ (0)