Ҳиндистон тарихда илк бор АҚШга смартфон экспорт қилиш бўйича Хитойни ортда қолдириб, биринчи ўринга чиқиб олди. Бу ҳақда CNN хабар берди.
Canalys тадқиқот компанияси 29 июль куни эълон қилган ҳисоботга кўра, 2025 йилнинг иккинчи чорагида АҚШга импорт қилинган смартфонларнинг 44 фоизи Ҳиндистонда ишлаб чиқарилган. Бу кўрсаткич 2024 йилнинг шу даврида 13 фоизни ташкил этганди.
Ҳиндистонда ишлаб чиқарилган смартфонлар ҳажми бир йилда 240 фоизга ошган. Шу билан бирга, Хитойда йиғилган қурилмалар улуши 25 фоизга пасайган — 2024 йилнинг шу чорагида бу кўрсаткич 61 фоиз эди. Бу Хитойнинг экспортда учинчи ўринга тушиб қолганини англатади, иккинчи ўринга эса Вьетнам чиқиб олган.
Canalys етакчи таҳлилчиси Саням Чаурасия бу ўзгаришни асосан Apple’нинг ишлаб чиқаришни Хитойдан Ҳиндистонга кўчириш ҳаракати билан боғлади. Унга кўра, Apple сўнгги йилларда Ҳиндистондаги ишлаб чиқариш қувватини кенгайтирган ва 2025 йил бошидан буён экспорт қувватининг асосий қисмини АҚШ бозорини таъминлашга йўналтирган.
“Бироқ Apple ҳали ҳам Хитойдаги ишлаб чиқариш базаларига қисман боғлиқ”, дейди Чаурасия.
АҚШ президенти Дональд Трамп томонидан жорий этилган ўзаро савдо тарифлари смартфонлар ва бошқа электроникаларни истисно қилгани сабабли, Хитойда ишлаб чиқарилган iPhone’лар оғир божхона солиқларидан қутулиб қолган эди. Бироқ 2025 йил май ойида Дональд Трамп Apple компаниясини АҚШда iPhone ишлаб чиқаришга чақирган. Унинг таъкидлашича, агар Қўшма Штатларда сотиладиган iPhone’лар хорижда, хусусан Ҳиндистон ёки Хитойда ишлаб чиқарилса, у ҳолда Apple 25 фоиз бож солиғи тўлашга мажбур бўлади.
“Мен Apple’ни Ҳиндистонда кўришни хоҳламайман. iPhone’ларни АҚШда ишлаб чиқарилишини истайман”, деган эди Трамп Truth Social’даги постида.
Изоҳ (0)