Австралиянинг Квинсленд штатида жойлашган Боуэн космодромидан учирилган илк маҳаллий орбитал ракета — Эрис — ҳавога кўтарилгач атиги 14 сония ичида қулаб тушди. Бу ҳақда The Guardian хабар берди.
Бу бахтсиз ҳодисага қарамай, Австралия космик саноати ушбу муваффақиятсиз синовни тарихий бурилиш сифатида баҳоламоқда.
23 метр узунликдаги ва 30 тонна оғирликдаги ракета Gilomur Space компанияси томонидан ишлаб чиқилган. У узоқ кутилган парвоздан сўнг қисқа муддат ҳавода туриб, катта тутун тўплами остида ерга қулаб тушган. Ушбу ҳолатни юзлаб қизиқувчилар тепаликлардан кузатган, жумладан, “Aussienaut” номи билан танилган ютубер Жош Кееган ҳам воқеани жонли эфирга узатган.
Ракетанинг илк парвози 18 ой кутилиб, яқин кунларгача об-ҳаво шароити сабабли учирилмай келинаётганди. Компания эса бу синов парвозини катта қадам деб баҳоламоқда.
“Бу бизнинг орбитал космик кемаларни мунтазам учираётган 6 та давлат қаторига киришимизга туртки бўлади. Энг муҳими, жамоамиз соғ-саломат ва навбатдаги парвозга тайёр”, дейилади Gilomur Space баёнотида.
Компания раҳбари Адам Gilomur эса ижтимоий тармоқларда шундай изоҳ қолдирган:
“Ракета старт майдончасидан ажрала олди — мен бундан мамнунман. Албатта, узоқроқ учишини хоҳлаган эдим, лекин натижадан қониқдим”.
Австралиядаги ёшларни космос соҳасига тайёрлашга йўналтирилган One Giant Leap Australia Foundation ҳам Gilomur Space жамоасини табриклаб, шундай деди:
“Ягона ўрганиш йўли — бу хатолар орқали олдинга силжиш. Бугун кечагидан кўпроқ билимга эгамиз”.
Маълумот учун, компания май ойида илк парвозни амалга оширишни режалаштирганди. Австралия ҳукумати Eris лойиҳаси учун Gilomur Space’га 5 миллион доллар маблағ ажратган. У компаниянинг кейинги авлод суюқ ёқилғили ракета двигателини ишлаб чиқишига хизмат қилади.
Изоҳ (0)