Корея ярим оролида қуролли можаролар бошлангудек бўлса, урушнинг дастлабки кунларидаёқ юз минглаб одам ҳалок бўлади. Бу ҳақда АҚШ Конгрессининг тадқиқот хизматига таяниб, Bloomberg хабар берди.
Таъкидланишича, ядровий қурол қўлланилмасдан, оддий қуроллар ишлатилганида ҳам дастлабки кунлардаги қурбонлар сони 30 мингдан 300 минггача бўлиши мумкин. Тадқиқотчилар Шимолий Корея артиллериясининг дақиқасига 10 мингтагача снаряд ота олишини инобатга олиб бу каби хулосага келди. Шунингдек, қайд этилишича, уруш чегаранинг икки тарафида яшовчи 25 миллион аҳолига бевосита таъсир кўрсатади.
Бундан ташқари АҚШ Конгресси можарога Хитой, Япония, Россия, шунингдек, АҚШ ҳам жалб этилиши мумкинлигини маълум қилди.
Ҳисоботда кўрсатилишича, Вашингтоннинг Хитой билан ҳарбий тўқнашув ёқасига келиб қолиш хавфи мавжуд. Ҳужжатда Пекиннинг эҳтимолий реакцияси «ярим оролдаги қуролли можаро оқибатида юзага келадиган энг муҳим геосиёсий масаладир», дейилади.
Изоҳ (0)