ИШИДга қарши курашиш бўйича АҚШ бошчилигидаги коалиция террорчилик ташкилоти раҳбарлари жойлашгани тахмин қилинаётган Дайр-аз-Зор вилоятининг Абу-Камол шаҳрига ҳужум уюштиришга тайёргарлик кўрмоқда. Бу ҳақда коалиция вакили Райан Диллоннинг сўзларига асосланиб, «РИА Новости» хабар бермоқда.
«Биз ‘Сурия демократик кучлари’ томонидан Омар нефть конида эришилган муваффақиятларни мустаҳкамлашимиз ва ҳанузгача ИШИД тасарруфида бўлган ҳудудларни тозалашимиз керак. Шундан сўнг биз ИШИД раҳбарлари жойлашгани тахмин қилинаётган Абу-Камолга ҳужум уюштирамиз», — дейди Диллон.
Унинг сўзларига кўра, Ироқдаги Мосул ва Суриядаги Раққа шаҳарлари озод этилгач, Абу-Камол террорчиларнинг асосий таянчига айланди.
Шу билан бирга коалиция вакили ИШИДни тамомила йўқ қилиш учун қанча вақт талаб этилишини аниқ айтмади.
У бир томондан Ироқдаги Мосул шаҳрини озод этиш операцияси узоқ давом этгани ва иккинчи томондан Тел-Афар ва Ховижани озод этиш операциялари режалаштирилгандан кўра тезроқ юз берганини мисол тариқасида келтирди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)