«Пахтакор»нинг кетма-кет 3-ўйинида ҳакамлар можароси. «Бунёдкор» офсайддан урилган гол эвазига мағлуб этилди (видео)

«Пахтакор» ва «Бунёдкор» клублари ўртасидаги Олий Лига 26-турида Камолиддин Тожиевнинг ўйиндан ташқари ҳолатдан урган ягона голи Шота Арвеладзе жамоасига ғалаба келтирганди. «Championat.asia» нашри Спорт-ТВ трансляциясидан скриншот келтириб, беллашув тақдирини ҳал қилган ягона гол офсайддан киритилганини кўрсатиб берди.

Тошкент дербиси Арвеладзе бошқарувидаги «Пахтакор»нинг «Бунёдкор» устидан ғалабаси билан тугади

Тошкент дербисида Асимовга қанотларда Александр Сидоров ва Дониёр Сайлавов ёрдам берди. Беллашув назоратчиси шу куни бош ҳакам Асимовни 7,8 баллга лойиқ кўрди. Қанот ҳакамларидан Сидоров 8 балл олди. Учрашувда кўплаб хатоларга йўл қўйган ва айниқса, ўйин тақдирини ҳал қилган ягона голда оффсайдни кўрмаган Дониёр Сайлавов 4 балл, яъни, мактаб мавқесида «2» баҳо олди.Қайд этиш керак, «Пахтакор» иштирокидаги қаторасига тўртинчи ўйинда можаро келиб чиқмоқда. Шуларнинг кетма-кет 3 тасида вазият бевосита футбол ҳакамлари билан боғлиқ экани қизиқ ҳолат. Наманганда кечган «Навбаҳор»га қарши ўйиндан кейин мезбонлар жарима билан жазоланган бўлса, Тошкентдаги «Қўқон—1912»га қарши учрашувдан кейин ПФЛ 4 ҳакам ва назоратчини мавсум якунига қадар футболдан четлаштириб юборганди. Бунда учрашувнинг боришига умуман аралашмаган 4-ҳакам нега четлаштирилгани ПФЛ томонидан тушунтирилмади. Назоратчи эса ўйинни савиясиз бошқарган ҳакамларга юқори баҳо қўйгани учун жазоланди.

Дўпписини ол деса... Қанот ҳаками хато қилди, ЎФФ эса 4 ҳакам ва назоратчини футболдан четлатди

Сўнгги турни «Пахтакор» Бухорода ўтказиб, 2:0 ҳисобида зафар қучди. Ўйиннинг боришини Шерзод Қосимов «Бухоро» дарвозасига белгилаган пенальти ўзгартириб юборди. Бунда пенальти аслида йўқлиги борасида баҳс авж олди, бироқ Шерзод Қосимов иши кўриб чиқилмади. Воқеадан жунбушга келгани учун «Бухоро» клуби якунда 55 миллион сўм жаримага тортилди.

«Пахтакор» келган ўйинда «Навбаҳор» жарима тўлаганди. Энди шундай ўйиндан кейин «Бухоро» 55 миллионга тушди

Ва энди Тошкент дербисида «Пахтакор» яққол оффсайддан киритилган гол сабаб 3 очкони қўлга киритди.

Қуйида қанот ҳаками Дониёр Сайлавов йўл қўйган 2 та жиддий хато кўрсатиб ўтилади. Бири 66-дақиқада рўй берган. Тўп дарвоза чизиғини кесиб ўтмаган бўлса-да, лайнсмен уни гол деб эълон қилган ва марказга югурган. Хушёр тортган бош ҳакам Азиз Асимов эса қанот ҳаками билан вазиятни муҳокама қилган ва барча масъулиятни ўз бўйнига олиб, кўринишидан адолатли қарор чиқарган ва голни ҳисобга олмаган.

85-дақиқада эса қанот ҳаками Камолиддин Тожиев томонидан киритилган голни барибир инобатга олди ва майдон марказига югурди. Асимов эса иккинчи бор унга қарши чиқа олмади. Такрорий лавҳа кўрсатиб бердики, Камолиддин Тожиевдан ташқари «Пахтакор»нинг яна бир футболчиси ҳам ўйиндан ташқари ҳолатда бўлган.

«Пахтакор» ва «Бунёдкор» клублари Чемпионлар Лигаси йўлланмаси учун кураш олиб бораётганди. Мазкур мағлубиятдан кейин Миржалол Қосимов бошқарувидаги «Бунёдкор»нинг чемпион бўла олмаслиги расман ойдинлашди. «Насаф» ва «Пахтакор» эса олтин медаллар учун курашни давом эттиради.