30 сентябрь куни футбол бўйича Франция чемпионатининг 8-туридан олган «Амьен» — «Лилль» учрашуви вақтида бир гуруҳ мухлислар стадион трибунасидан қулади. Дарвоза ортидаги секторни ажратиб турган панжара ишқибозлар босимига дош бера олмади, дея хабар бермоқда TJournal.
Ишқибозлар учрашувнинг 16-дақиқасида, «Лилль» футболчисининг голини нишонлаш вақтида трибунадан қулаган. Ерга жами 100 киши тушиб кетган. Le Figaro маълумотларига кўра, улардан камида 29 нафари жабрланган. Жиддий жароҳат олган тўрт киши касалхонага юборилган.
Terribles images de l'effondrement d'un grillage à Amiens après le but lillois 😧. 3 blessés graves. #ASCLOSC #Ligue1 pic.twitter.com/fQoRT1S05L
— Jean-Xavier Franco (@jxfranco) September 30, 2017
Мазкур ҳодисадан сўнг, учрашув тўхтатилган. Стадион раҳбарияти яқинда трибуналар ҳолати текширувдан ўтказилгани, ўшанда бирор бузилиш ёки носозлик аниқланмаганини қайд этиб ўтди.
BBC News’нинг қайд этишича, «Амьен» ва «Лилль» ўртасидаги учрашув дерби мақомига эга (икки шаҳар орасидаги масофа атиги 98 километр) бўлгани учун ҳам мухлислар жунбушга келган ва трибунадан тушиб кетган.
«Амьен» сўнгги 116 йилдан бери биринчи марта Франция 1-дивизионида қатнашмоқда. Жамоа уй учрашувларини 12 минг мухлисга мўлжалланган стадионда ўтказади — бу Франция чемпионатидаги барча 20 клуб орасида энг кичик кўрсаткич.
L’Equipe маълумотларига кўра, «Амьен» президенти юз берган воқеада «Лилль» мухлисларини айблаган. Унинг айтишича, полиция стадионга ноқонуний йўл билан кирган 200 тажовузкор кайфиятдаги мухлис ҳақида олдиндан огоҳлантирган. «Тўсиқлар аъло даражада эди, фанатлар сони эса якунда 500 дан ошиб кетган», — деди «Амьен» президенти.
«Лилль»нинг ижрочи директори «Амьен»даги ҳамкасбига жавоб бериб, унинг баёнотини масъулиятсиз ва иғвогарона деб атади. Унинг қайд этишича, айбдорларни аниқлаш билан Франция Профессионал футбол лигаси шуғулланади.
Изоҳ (0)