Ўзбекистонда янги намунадаги ҳайдовчилик гувоҳномалари биринчи босқичда фақат автомактабларнинг битирувчиларига берилади. Бу ҳақда, Тошкент шаҳар ИИББ ахборотига асосланиб, «Kommersant.uz» хабар бермоқда.
Тошкент шаҳрида биринчи босқичда автомактабларнинг битирувчилари янги намунадаги ҳайдовчилик гувоҳномаларини Файзобод даҳасидаги Миробод туман Йўл ҳаракати хавфсизлиги бошқармаси (ЙҲХБ) имтиҳон-рўйхатга олиш бўлимида олади.
Иккинчи босқичда Юнусобод ва Чилонзор туманларидаги ЙҲХБ бўлимларини ҳам махсус ускуналар билан таъминлаш режалаштирилган. Шундан сўнг янги намунадаги ҳайдовчиларини бериш оммавий тартибга ўтади.
«Kommersant.uz»нинг ёзишича, Файзободдаги янги намунадаги ҳайдовчилик гувоҳномаларининг берилиши 20 октябрдан бошланади.
Ўзбекистон ҳукуматининг 2 мартдаги қарорига кўра, янги намунадаги ҳайдовчилик гувоҳномаларининг берилиши бутун мамлакат бўйлаб 1 октябрдан бошланиши лозим эди. Янги намунадаги миллий ҳайдовчилик гувоҳномаси берилган кундан бошлаб 10 йил муддатга берилади.
Амалдаги ҳайдовчилик гувоҳномаларини янги намунадагиларига алмаштириш 2017 йил 1 октябрдан 2018 йил 31 декабргача — эски намунадаги миллий ҳайдовчилик гувоҳномалари учун, уларнинг берилган санасидан қатъи назар — улар эгасининг ёзма аризасига кўра ихтиёрий равишда, 2019 йил 1 январдан 2020 йил 31 декабргача эса — эски намунадаги барча миллий ҳайдовчилик гувоҳномалари учун, уларнинг берилган санасидан қатъи назар — мажбурий тартибда амалга оширилади.Аввалроқ янги ҳайдовчилик гувоҳномалари учун тўлов миқдори белгилангани ҳақида хабар берилган эди. Унга кўра, автомототранспорт воситаси рўйхатдан ўтказилганлиги тўғрисида гувоҳномани бериш учун энг кам иш ҳақининг 70 фоизи миқдорида (19 октябрь ҳолатига кўра — 104 842 сўм 50 тийин), шунингдек ҳайдовчилик гувоҳномасини бериш учун энг кам иш ҳақининг 70 фоизи миқдорида (19 октябрь ҳолатига кўра — 104 842 сўм 50 тийин) тўлов ундирилади.
Изоҳ (0)