Оддий автомобилни афзал кўрган 5 миллиардер

«Carzone.uz» нашри арзон автомобилни афзал кўрувчи дунёнинг энг бадавлат кишилари ҳақида мақола чоп этди.

Уоррен Баффет — Cadillac XTS

Машинасининг нархи, тахминан, 45 минг доллар

Cadillac автомобилини жўн деб бўлмайди, албатта. Аммо 77,3 млрд доллари бор америкалик бунақа машина миниши ғайриоддий ҳол. Шунга қарамасдан Баффет Cadillac XTS’да юриши бор гап. Унинг седани 2014 йилда ишлаб чиқарилган. Миллиардер «Кадиллак»ни ёқтирса керак – бундан олдинги машинаси ҳам Cadillac DTS (2006) эди.

Афтидан, Баффет жуда кўп юргани учун бу автомобилни танлаган. У шахсий автомобилида бир йилда ўртача 5600 км йўл босиб қўяди.

Марк Цукерберг - Acura TSX

Машинасининг нархи, тахминан, 30 минг доллар

Facebook асосчиси ва дунё бойларининг бешинчиси камтарона турмуши билан бутун дунёда машҳур. Масалан, GQ журнали Цукербергни Кремний водийсининг энг дидсиз кийинувчи фуқароси, деб атаган. Чунки Марк қалпоқли кенг кўйлак ва футболка кийиб юради. Автомобиль танлашда ҳам юксак диди билан ажралиб турмайди.

CNBC каналининг хабарига кўра, Цукерберг 2014 йилда ишлаб чиқариши тўхтатилган Acura TSХ’да юради. Миллиардер бу машинани «хавфсиз, қулай ва дабдабадан холилиги» учун танлаган экан. Бой Цукерберг битта автомобиль билан кифояланиб қолмаган, унда Volkswagen Golf GTI ҳам бор. Иккала машинасининг нархи деярли бир хил. Хуллас, Facebook асосчисининг гаражи ўртамиёна америкаликнинг гаражидан фарқ қилмайди.

Элис Уолтон — Ford F-150

Машинасининг нархи, тахминан, 40 минг доллар

Элис Уолтонни кўпчилик танимайди. Wal-Mart савдо салтанатининг асосчиси, 80 йилларда Американинг энг бой кишиси Сем Уолтон вафотидан кейин унинг бойлиги қизи Элисга қолган. Элис Луиза Уолтоннинг бойлиги 40,8 миллиард долларга баҳоланади, аммо миллиардер хоним камтарга камол ақидасига амал қиладиганлардан.

Унинг шахсий автомобили 2006 йилга мансуб Ford F-150 пикапидир. Ранчоси ҳам арзигулик деб бўлмайди. Унинг отаси ҳам 1979 йилдан бошлаб Ford F-150да юрган.

Стивен Балмер — Ford Fusion Hybrid

Машинасининг нархи, тахминан, 28 минг доллар

Microsoft’нинг собиқ бош директори ва ҳозир баскетбол жамоасининг эгаси Стивен Балмер сайёранинг бойлари рўйхатида 21-ўринни эгаллайди. Унинг бойлиги 30 миллиард доллар атрофида. Балмер Ford автомобилларининг мухлиси, чунки унинг отаси бу компанияда менежер бўлиб ишлаган.

2009 йилда Ford компанияси унга ўртача ўлчамдаги Ford Fusion гибрид седанини расман ҳадя қилган. Бу Ford’ларнинг энг қиммати бўлмаса ҳам Балмерга ёққан. Эҳтимол, миллиардернинг бошқа машинаси ҳам бордир, бироқ у ҳамиша Fusion Hybrid’да юради.

Ингвар Кампрад — Volvo 240 GL

Машинасининг нархи, тахминан, 22 минг доллар

IKEA савдо компаниясининг эгаси Ингвар Кампрад ўз ватани Швецияга қайтди. Бунгача у 20 йилча Швейцарияда яшади. Унинг севимли автомобилларидан бири 1993 йилда чиқарилган Volvo 240 GL эди. Кампраднинг камтарлигини топ-менежерларнинг ижтимоий ахлоқ масъулиятига мисол қилиб келтириш мумкин.

IKEA асосчисида илгари Porsche ҳам бўлган, аммо ҳозир минмайди. У рулга ўтирмай қўйган, чунки 91 ёшида машина миниш учун жуда хавфли.