Украина президенти Пётр Порошенко мамлакат Олий Радаси олдида норозилик намойиши ўтказаётган Михаил Саакашвили тарафдорларидан намойишнинг тинч ўтишини таъминлашни сўради. Бу ҳақда «РБК» хабар бермоқда.
Айни вақтда, президент 2015 йили Олий Радани штурм билан эгаллаб олишга уриниш вақтида қайд этилган қурбонлар ҳақида ҳам эслатиб ўтди.
«Мен мазкур намойишни тушунаман ва унинг иштирокчиларига ҳурмат билан муносабатда бўламан. Мен унинг тинч ўтишини талаб қиламан... Масъулиятсиз сиёсатчилар 2015 йил 31 августидаги каби тўрт миллий гвардиячининг ўлимига сабаб бўлган фожиали воқеаларни такрорлашига ҳеч қанақасига йўл қўймаслик даркор», — деди Порошенко Киевда Мальта президенти билан учрашув вақтида.
Украина президенти ҳуқуқни муҳофаза қилиш органлари ходимлари ва акция иштирокчиларини хавфсизликни таъминлашга масъулият билан ёндашишга чақирди.
17 октябрь куни Украина парламенти биноси олдида Одесса вилояти собиқ губернатори Михаил Саакашвили ва унинг тарафдорлари аксилкоррупция намойишини ўтказмоқда. Саакашвили намойиш давомида президент Пётр Порошенко истеъфосини талаб қилди.
Изоҳ (0)