АҚШ томонидан қўллаб-қувватланувчи қуролли гуруҳлардан бири — «Сурия демократик кучлари» («СДК») узоқ вақтдан бери ИШИД террорчилик ташкилоти пойтахти деб баҳоланиб келган Раққа шаҳрини жангарилардан тортиб олди. Бу ҳақда Meduza хабар бермоқда.
Reuters агентлиги хабарига кўра, 17 октябрь куни Сурия ҳукуматига мухолифатда бўлган «СДК» кучлари террорчиларнинг Раққадаги сўнгги қаршилик кўрсатиш нуқтаси — стадионни эгаллаган. Раққа штурми тахминан тўрт ой давом этди.
ИШИД Раққани 2014 йил январида, Ироқ ва Суриянинг катта ҳудудлари эгаллаб олиниши билан якунига етган кенг миқёсли босқин давомида ўз назоратига ўтказган эди.
2016—2017 йиллар давомида Россия кўмагида ҳаракат қилаётган Сурия ҳукумати армияси ҳамда АҚШ бошлиқ халқаро коалиция ёрдамида кураш олиб бораётган Сурия мухолифати ва Ироқ армияси операциялари давомида ИШИД ўзи эгаллаган қарийб барча ҳудудлардан маҳрум бўлди.
2017 йилнинг июль ойида ИШИД Мосулдан қувиб чиқарилган эди — бу террорчилар томонидан босиб олинган Ироқдаги энг йирик шаҳар эди.
Изоҳ (0)