Фарғона вилояти Ички ишлар бошқармаси тезкор ходимлари томонидан тунги вақтда вилоятнинг Қўштепа тумани Янги ҳаёт қишлоғидаги фермер хўжалиги шийпонида боқилаётган, бир дона нархи 3 миллион сўм бўлган сигирни ўғирлаб кетаётган шахслар Тошлоқ туманида ашёвий далил билан қўлга олинган. Бу ҳақда вилоят ИИБ ахборот хизмати хабар берди.
Олиб борилган тезкор суриштирув ишлари давомида 1975 йилда туғилган, муқаддам ўғрилик жинояти учун судланган А.Д. ўзининг жиноий шериклари — 1973 йилда туғилган Б.А., 1975 йилда туғилган, муқаддам бир неча бор судланган Т.Ж., 1978 йилда туғилган Р.Ш., 1981 йилда туғилган, муқаддам судланган М.А. ва 1990 йилда туғилган З.Р. билан биргаликда Қўштепа ва Фарғона туманлари ҳудудида фуқароларга тегишли сигирларни ўғирлаш билан шуғулланганлиги маълум бўлди.
Улар 29 мартга ўтар кечаси Қўштепа туманининг Нуробод кўчасидаги хонадондан бир дона 3,5 миллион сўмлик, 1 апрелга ўтар кечаси Фарғона туманининг Қирғизшўра кўчасидаги хонадондан бир дона 3 миллион сўмлик, 13 апрелга ўтар кечаси Фарғона туманидаги фермер хўжалиги дала шийпонида боқилаётган икки дона 4 миллион сўмлик, 18 апрелга ўтар кечаси Қўштепа туманидаги фермер хўжалиги дала шийпонида боқилаётган бир дона 1,5 миллион сўмлик ва бир дона 3 миллион сўмлик, 24 апрелга ўтар кечаси Қўштепа туманида жойлашган фермер хўжалиги дала шийпонида боқилаётган бир дона 1,5 миллион сўмлик ва бир дона 1,3 миллион сўмлик сигирларни ўғирлаган.
Жиноий гуруҳ аъзоларидан жами тўққиз бош қорамол ашёвий далил тариқасида олинди. Улар ўғриликни жиноий гуруҳ аъзоларидан бирига тегишли «ВАЗ-2102» русумли автомашинада содир этган.
Ҳозирда жиноий гуруҳнинг барча аъзоларига нисбатан жиноят иши қўзғатилиб, уларнинг бошқа жиноятларга алоқадорлиги текширилмоқда.
Изоҳ (0)