Тошкент сейсмик фаол ҳудудда жойлашгани ва шаҳарнинг тарихан шаклланган меъморий қиёфаси мавжудлигидан келиб чиқиб, Tashkent City концепцияси табиат билан ҳамоҳанглик ва замонавий урбанистик ғоялар асосида ишлаб чиқилган. Унда иш билан боғлиқ фаолликнинг яшил шаҳар ғоялари, сувнинг салқини, ҳордиқ учун хиёбонлар билан уйғунлигига алоҳида эътибор қаратилган.
Шулардан келиб чиқиб, бизнес офислар, меҳмонхона ва апартаментлар учун мўлжалланган баланд бинолар қаватлари сонини 40 тадан, турар жой бинолари қаватлари сонини эса 12 тадан оширмасликка қарор қилинди. Бундан ташқари, Сити ҳудудида конференс ва кўргазма марказлари, гипермаркет, кўплаб савдо майдонлари, ресторан ва кафелар бўлади.
Tashkent City’нинг ички қисмидаги автомобиль йўллари Тошкентнинг шоҳ кўчалари каби кенг бўлиши кутилмоқда, айни вақтда деярли ҳар бир бино остида ерости автотураргоҳлари бўлади. Бино ва иншоотларнинг дизайни энг илғор архитектура ва миллий ўзига хослик тамойилларига асосланган ҳолда ишлаб чиқилади.
«Мазкур улкан лойиҳани амалга ошириш учун Вазирлар Маҳкамаси ҳузурида Дирексия ташкил этилган бўлиб, Tashkent City’ни қуриш ва унинг самарали фаолиятини йўлга қўйиш вазифаларига масъул маҳаллий ва хорижий инвесторларни бирлаштиради», — дейилади шаҳар ичидаги шаҳарнинг Facebook’даги саҳифасида эълон қилинган ахборотда.
Маълумот учун, айни вақтда Ўзбекистондаги энг баланд бино бу — Тошкентдаги Миллий банк бош қароргоҳи биноси бўлиб, у 23 қаватдан иборат.
Изоҳ (0)