Владимир вилоятида юз берган йўл-транспорт ҳодисаси вақтида поезд машинисти авариядан қочишга ҳаракат қилган ва фавқулодда тормозланишни қўллаган, натижада тормоз йўлининг узунлиги 746 метрни ташкил этган. Бу ҳақда «Россия темир йўллари» тезкор штаби мажлисининг ҳисоботига асосланиб, «РИА Новости» хабар берди.
«Дастлабки маълумотларга кўра, поезд тўқнашув содир бўлган жойдан 400 метр нарида соатига 90 километр тезликда ҳаракатланиб келаётган бўлган. Машинист фавқулодда тормозланишни ишга туширган, ёруғлик ва товуш сигналларини берган. Фавқулодда тормозланиш тезликни минимал имкониятга қадар пасайтиришга ёрдам берган, бироқ оралиқ масофа тўлиқ тўхташни амалга ошириш учун етарли бўлмаган. Поезднинг тормоз йўли салкам 746 метрни ташкил этган», — дейилади хабарда.
Поезд тергов ишлари тугаганидан сўнг, яна йўналиши бўйича ҳаракатлана бошлаган, унинг кечикиши 7 соат-у 6 дақиқани ташкил этган.
Россиянинг Владимир вилояти Петушинский туманидаги темирйўл кесишмасида маҳаллий вақт билан 03:39 да (Тошкент вақти билан 05:39 да) автобус ва поезд ўртасида тўқнашув юз бериши оқибатида 19 нафар Ўзбекистон фуқароси ҳалок бўлди.
Изоҳ (0)