Мадагаскарда 230 дан ортиқ киши ўлатни юқтириб олган, 33 киши мазкур касалликдан вафот этди. Бу ҳақда «РИА Новости» хабар бермоқда.
Бутунжаҳон соғлиқни сақлаш ташкилоти матбуот котиби Тарик Язаревичнинг маълум қилишича, ташкилот мамлакат ҳудудида транспорт воситаларининг ҳаракатига ҳеч қандай чеклов қўйишни режалаштирмаяпти.
«Мадагаскарда 231 киши ўлат билан касалланган, 33 киши вафот этган», — деди у.
Бутунжаҳон соғлиқни сақлаш ташкилоти ходимининг сўзларига кўра, ташкилот Мадагаскарга беш минг нафар беморни даволашга ва яна 100 минг кишининг саломатлигини ҳимоя қилишга етадиган 1,2 миллион вакцина дозасини юборган.
Язаревич Бутунжаҳон соғлиқни сақлаш ташкилоти Мадагаскарга саёҳат қилиш ва транспортда ҳаракатланишга чеклов қўйишни тавсия этмаслигини таъкидлади.
Ташкилотнинг қайд этишича, Мадагаскарда касалликка чалинганлар сифатида рўйхатдан ўтганларнинг ярми ўпка вабосидан азият чекмоқда. Инсонлар бу касалликка чалинганидан сўнг бир сутка мобайнида даволанмаса, вафот этади. Бундан ташқари, ўпка вабоси бир инсондан иккинчисига йўтал орқали юқади.
Бутунжаҳон соғлиқни сақлаш ташкилоти маълумотларига кўра, ўлат ўз вақтида аниқланса, уни даволаш мумкин.
Аввалроқ, Мадагаскарда 19 киши ўлат қурбони бўлгани ҳақида хабар берилган эди.
Изоҳ (0)