Каталония мустақиллиги учун 1 октябрь куни бўлиб ўтган референдум ноқонуний эди. Бу ҳақда Европа комиссиясининг расмий вакили Маргаритис Схинас Брюсселда бўлиб ўтган матбуот анжуманида маълум қилди, деб хабар берди «ТАСС».
«Испания конституциясига кўра, кеча Каталонияда бўлиб ўтган овоз бериш жараёни қонунга зид», — деди Европа комиссиясининг расмий вакили.
Схинаснинг сўзларига кўра, Европа комиссияси бир неча бор «Каталониядаги вазият — Испаниянинг ички иши эканлигини ва у Испания конституциясига мувофиқ ҳал этилиши лозим»лигини таъкидлаган. «Шунингдек, биз Европа комиссиясининг қонуний позициясини тасдиқлаймиз: агарда референдум испан конституциясига мувофиқ равишда ўтказилганида ҳудудни тарк этаётган мамлакат Европа Иттифоқини ҳам тарк этган бўларди», — дея қайд этди Схинас.
Шунингдек, Схинаснинг маълум қилишича, Европа комиссияси раҳбари Жан-Клод Юнкер Каталониядаги вазиятни 2 октябрь куни Испания бош вазири Мариано Рахой билан муҳокама қилади.
Изоҳ (0)