Отишма
Якка ўқотар 1 октябрь оқшомида Лас-Вегасдаги кантри-фестиваль қатнашчиларига қарата ўт очди. Жиноятчи «Мандалай Бэй» меҳмонхонасининг 32-қаватидаги хонада бўлган ва ойнадан туриб ўт очган. Унинг айнан нима билан қуроллангани ҳозирча расман эълон қилингани йўқ, бироқ, гувоҳларнинг сўзларига кўра, бу автоматик қурол эди.
Эркак меҳмонхонадан бир неча юз метр наридаги Лас-Вегас-Стрипда бўлаётган Route 91 Harvest кантри-фестивалига йиғилган оломонни бир неча дақиқа давомида тўхтовсиз ўққа тутган. Лас-Вегаснинг энг машҳур кўчаларидан бирида ташкил этилган фестивалга 30 мингга яқин киши ташриф буюрган эди. Дастлабки ўқ овозлари эшитилганидан сўнг ваҳима бошланди; шунингдек, отишма Лас-Вегас-Стрипнинг турли томонларидан олиб борилаётгани ҳақида ҳам хабарлар пайдо бўлди, бироқ бу ахборот тасдиқланмади.
HORRIFIC SCENE: Do not let this be called anything else but DOMESTIC TERRORISM. AP reports 2dead 13critical & dozens injured. #MandalayBay pic.twitter.com/q7faKkCPpN
— Eduardo Samaniego🗽 (@EddyComunica) October 2, 2017
Камида 50 киши ҳалок бўлган, 200 дан зиёд одам турли даражада жароҳат олган. Бу АҚШ тарихидаги энг йирик оммавий қотилликдир. Аввалига бетартиб отишма оқибатида фақат икки киши ҳалок бўлгани айтилди, бироқ кўп ўтмай қурбонлар сони бир неча баробар кўплиги маълум бўлди. Жиноятчининг ўзи ҳам ўлдирилди — уни меҳмонхонасидаги хонаси эшикларини бузиб кирган SWAT махсус хизмати жангчилари отиб ташлади. Ҳалок бўлганлар орасида икки полициячи ҳам бор — улар отишма вақтида хизматда эмас, балки фестивалга қўшиқ эшитиш учун келган меҳмонлар эди. Хизматдаги полициячилардан икки нафари яраланган.
Отишма бошланган вақтда фестиваль саҳнасида кантри-хонанда Жейсон Элдин куйлаётган эди. У ҳам, бошқа машшоқлар ҳам жабрлангани йўқ. Элдиннинг сўзларига кўра, у гувоҳи бўлган манзара «даҳшатдан ҳам даҳшатлироқ» эди.
Жиноятчи
Жиноятчининг шахси аниқланган. Отишма Лас-Вегас чеккасида истиқомат қилувчи оқ танли 64 ёшли эркак — Стивен Педдок томонидан уюштирилган. У авваллари ҳеч қачон полиция эътиборига тушмаган; автоматик қурол унинг қўлига қаердан тушиб қолгани номаълум.Педдок «Мандалай Бэй» меҳмонхонасидан келиб чиқиши осиёлик бўлган, ҳозирда Невадада истиқомат қилувчи аёл — 62 ёшли Марилу Дэнли билан бирга хона олган. Улар қандай муносабатда бўлгани маълум қилинмаяпти. Отишмадан бир неча соат ўтиб полиция аёлни қидириб топди. Бундан ташқари, Педдокка тегишли икки автомобиль ҳам аниқланди.
Marilou Danley is being sought for questioning re the investigation into the active shooter incident. If seen please call 9-1-1! pic.twitter.com/Z83XvcHejH
— LVMPD (@LVMPD) October 2, 2017
Юз берган ҳодиса сабаблари номаълум. Қотил ҳеч қандай талабларни илгари сурмаган; унинг террорчилик ёки экстремистик гуруҳларга алоқадорлиги борасида ҳам маълумотлар йўқ. Айни вақтда полиция уни якка тартибда ҳаракат қилган қотил деб атамоқда ва бу оммавий қотилликнинг терроризмга алоқадорлигини рад этмоқда.
Изоҳ (0)