Қирғизистон бош вазири Сапар Исаков 29 сентябрь, жума куни Россияга келади. Бу мамлакат бош вазирининг Қирғизистон мустақилликка эришганидан бери биринчи бор Москвага расмий ташриф билан келиши ҳисобланади, деб хабар берди «РИА Новости».
«Бош вазир Сапар Исаков расмий ташриф билан Россияга келади. Бу Қирғизистон Республикаси бош вазирининг 1991 йилдан бери Россияга уюштирган биринчи бор расмий ташрифи ҳисобланади. Шунингдек, бу Сапар Исаковнинг бош вазир лавозимида Россияга биринчи бор келиши», — деди агентлик суҳбатдоши.
Қирғизистон парламенти 25 август куни президентлик сайловида иштирок этиш учун истеъфога чиққан Сооронбай Жээнбековнинг ўрнига Исаковни тасдиқлаган эди.
Қирғиз ҳукуматининг маълумотларига кўра, Қирғизистон бош вазири расмий ташриф доирасида бир қатор учрашувларни амалга оширади, жумладан, Россия бош вазири Дмитрий Медведев, Давлат думаси раиси Вячеслав Володин билан кўришади, шунингдек, Москвадаги номаълум аскар қабрига гул қўяди.
Бундан ташқари, Исаков ўзининг ташрифи вақтида Россияда истиқомат қилаётган қирғиз ватандошлари билан учрашиб, рус ОАВларига интервью беради. Ташриф 29—30 сентябрь кунлари бўлиб ўтади.
Изоҳ (0)