Россия президентлиги учун ўз номзодини қўйиши кутилаётган мухолифатчи Алексей Навальний Москвада қўлга олинди. Бу ҳақда Meduza хабар бермоқда.
Москва полицияси матбуот хизматининг маълум қилишича, Навальнийга нисбатан одамларни келишилмаган намойишларда қатнашишга бир неча бор чақирганлик сабаб маъмурий қоидабузарлик ҳақида баённома тузилган.
Хабар беришларича, маъмурий ҳуқуқбузарлик тўғрисидаги иш материаллари яқин вақт ичида судга юборилади. Қайд этишларича, Навальний сақланаётган полиция бўлинмаси олдида 30 га яқин одам тўпланган.
Навальнийга нисбатан маъмурий ҳуқуқбузарлик тўғрисидаги иш очилишига сабаб бўлган модда бўйича фуқаро 30 суткагача ҳибсда сақланиши ёки 150 мингдан 300 минг рублгача жарима тўлаши мумкин.
Алексей Навальний 29 сентябрь куни тонгда вокзалга кетаётганида қўлга олинган. У Нижний Новгород шаҳрига бориб, у ерда маҳаллий вақт билан 18:00 да бошланадиган ўз тарафдорлари митингида қатнашиши лозим эди.
Навальний қўлга олиниб, полиция бўлинмасига олиб келинганидан кўп ўтмай, Нижний Новгородда ҳам Навальнийнинг сайлов штаби бошлиғи Леонид Волков қўлга олинган. Унга нисбатан ҳам Навальнийники каби айбловлар илгари сурилмоқда.
Аввалроқ Навальний 29 сентябрдан 1 октябрга қадар Нижний Новгород, Оренбург ва Архангельск шаҳарларида ўз тарафдорлари иштирокида митинглар ўтказишни режалаштираётганини эълон қилган эди.
Изоҳ (0)