Москва ва Бутун Рус патриархи Кирилл бошчилигидаги Рус православ черковининг Москва Патриархати делегацияси 29 сентябрь куни Ўзбекистонга ташриф буюрди. Бу ҳақда ЎзА хабар бермоқда.
Ислом Каримов номидаги Тошкент халқаро аэропортида меҳмонни Тошкент ва Ўзбекистон епархияси раҳбари митрополит Викентий ва расмий шахслар кутиб олган.
Делегация аъзолари ташрифни Тошкентдаги Свято-Троицкий Николский аёллар монастирини зиёрат қилишдан бошлади.
Шундан сўнг Ўзбекистон Вазирлар Маҳкамаси ҳузуридаги Дин ишлари бўйича қўмита ҳамда Мусулмонлар идораси раҳбарлари билан учрашув бўлиб ўтди.
ЎзАнинг хабар беришича, патриарх Кириллнинг Ўзбекистонга ташрифи давом этмоқда. Дастур доирасида Бухоро ва Самарқанд шаҳарларининг диққатга сазовор жойлари билан танишиш, шунингдек, Ўзбекистон Биринчи Президенти Ислом Каримов хотирасига ҳурмат бажо келтириш ва қабрига гул қўйиш кўзда тутилган.
Рус православ черковининг Москва Патриархати делегацияси Тошкент епархиясининг 145 йиллиги муносабати билан «Туркистон» санъат саройида ташкил этиладиган тантанали тадбирда ҳам иштирок этади.
Изоҳ (0)