Саудия Арабистони қироли Салмон 26 сентябрь куни 2018 йил июнида мамлакатда маҳаллий аёллар ҳайдовчилик гувоҳномалари олиши ва машинани қонуний бошқариши мумкинлигини эълон қилди. Қироллик аёлларнинг машина ҳайдаши тақиқланган жаҳондаги ягона давлатдир. Шу билан бирга, қирол Салмоннинг бу қарори ҳали либераллашув бошланди дегани эмас — автомобилдан фойдаланиш учун аёллар олдингидай эркаклардан рухсат сўраши лозим бўлади, деб хабар беради Meduza.
Саудияда 1950 йиллардан буён ушбу тақиқ амал қилади.
Мамлакатдаги анъаналарга кўра, аёллар эркакларга нисбатан камроқ ҳуқуққа эга. Халқаро тенглик рейтингларида қироллик энг охирги ўринларда туради. Масалан, судда аёлларнинг кўрсатмаси эркакларникига нисбатан кучсиз ҳисобланади, улар шифохона ёки банкда бир пайтда бўлиши мумкин эмас. Аёллар кўчага ёлғиз чиқиши ҳам маъқулланмайди.
Ҳайдашнинг тақиқланганига маҳаллий фаоллар турлича сабаб ва баҳоналар топади. Жумладан, айтилишича, машина бошқариш аёлларнинг репродуктив тизимига салбий таъсир ўтказар экан; шунингдек, машина ҳайдаш аёлларга ортиқ даражада эркинлик бериб юбориши, кўпроқ кўчага чиқиш ва бошқа эркаклар билан мулоқот қилиш имкониятини туғдириши айтилади.
Бунга қарши илк эътирозлар 1990 йили бўлиб ўтганди. Ўшанда 47 нафар аёл ар-Риёд кўчалари бўйлаб машинада ўтган эди. Улар машина ҳайдашни билар ҳамда бошқа мамлакатларнинг ҳайдовчилик гувоҳномаларига эга эди. Воқеа Саудияда норозилик намойишларига олиб келди, аёллар ҳибсга олинди ва фақат қариндош эркакларнинг кафиллиги остида қўйиб юборилди.
Кейинчалик ҳам бу каби акциялар ўтказиб турилди. Жумладан, 2014 йили ҳуқуқ ҳимоячиси Лоужан Ҳатлул автомобилда кетаётганини видеога олганди. Ўшанда аёл 73 кунга ҳибсга олинди.
2013 йилга қадар мамлакатда аёллар ҳатто велосипед ҳайдаши тақиқланар эди.
Изоҳ (0)