Ироқ ҳукумати кучлари бугун, 16 сентябрь куни мамлакат ғарбидаги Анбар вилоятида ИШИД террорчилик ташкилотига қарши ҳужум бошлади. Бу ҳақда Ироқ қуролли кучлари вакили, генерал Абдул Амир Яраллага асосланиб, «ТАСС» хабар бермоқда.
Кампанияга армия бўлинмалари, «Ал-Ҳашд аш-Шааби» шиа кўнгиллилари ва чегара қўшинлари жалб этилган.
Уларнинг вазифаси Акашат қишлоғи ва унга ёндош бўлган ҳудудни экстремистлардан озод этиш ҳисобланади. Мазкур аҳоли яшаш пункти ИШИДнинг Сурия билан чегарадаги энг сўнгги таянч пунктларидан бири Ал-Қаим шаҳрига олиб боради. Шунингдек, радикаллар Анбардаги Ана ва Рава шаҳарларини ҳам ўз назорати остида ушлаб турибди.
Ироқлик ҳарбий эксперт Ҳишам ал-Ҳошимийнинг маълум қилишича, Акашатда ИШИДнинг қурол омборлари, жангарилар, хусусан худкушлар тайёрловчи лагерлари, шунингдек, қўлбола портловчи мосламалар ишлаб чиқарувчи фабрикаси жойлашган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)