Россиянинг Астрахан вилоятидаги Баскунчак тузли кўли никоҳ тўйи учун «Трава мурава» гуллар ва безак студияси ходимлари томонидан сиёҳ рангга бўялди. Бу ҳақда Astrakhan.Site портали хабар бермоқда.
Маросим ташкилотчиларининг бу иши ижтимоий тармоқларда норозиликларга сабаб бўлган. Кўплаб фойдаланувчилар безакчиларни атроф-муҳитни ифлослаётгани учун танқид қилган. Шу билан бир вақтда никоҳ тўйини ташкил қилувчи агентлик ўзининг «ВКонтакте»даги саҳифасида кўлни бўяш учун зарарсиз, озиқ-овқатга ишлатиладиган бўёқ қўлланилганини маълум қилган.
«Кўл сувининг тўйинган тузли суви ҳар қандай материалга жиддий таъсир кўрсатади. Кўлда бўлганлар оёқ кийимлари қандай тез ёпишқоқ бўлиши ва тезда яроқсиз ҳолатга келиб қолишини яхши билади. Бўёқлар фотосессия охирига келиб рангсизлана бошлади», — дейилади «Трава мурава»нинг хабарида.
«ТАСС»нинг ёзишича, табиатни муҳофаза қилувчи прокуратура кўлнинг бўялгани ҳақидаги ОАВда тарқалган хабарлар бўйича текширув бошлаган. Агар мутахассислар зарарловчи моддани аниқласа, ташкилотчилар жаримага тортилади.
Изоҳ (0)