Rossiyaning Astraxan viloyatidagi ko‘l to‘y fotosessiyasi uchun siyoh rangga bo‘yaldi

Rossiyaning Astraxan viloyatidagi Baskunchak tuzli ko‘li nikoh to‘yi uchun “Trava murava” gullar va bezak studiyasi xodimlari tomonidan siyoh rangga bo‘yaldi. Bu haqda Astrakhan.Site portali xabar bermoqda.

Marosim tashkilotchilarining bu ishi ijtimoiy tarmoqlarda noroziliklarga sabab bo‘lgan. Ko‘plab foydalanuvchilar bezakchilarni atrof-muhitni ifloslayotgani uchun tanqid qilgan. Shu bilan bir vaqtda nikoh to‘yini tashkil qiluvchi agentlik o‘zining “VKontakte”dagi sahifasida ko‘lni bo‘yash uchun zararsiz, oziq-ovqatga ishlatiladigan bo‘yoq qo‘llanilganini ma’lum qilgan.

“Ko‘l suvining to‘yingan tuzli suvi har qanday materialga jiddiy ta’sir ko‘rsatadi. Ko‘lda bo‘lganlar oyoq kiyimlari qanday tez yopishqoq bo‘lishi va tezda yaroqsiz holatga kelib qolishini yaxshi biladi. Bo‘yoqlar fotosessiya oxiriga kelib rangsizlana boshladi”, — deyiladi “Trava murava”ning xabarida.

“TASS”ning yozishicha, tabiatni muhofaza qiluvchi prokuratura ko‘lning bo‘yalgani haqidagi OAVda tarqalgan xabarlar bo‘yicha tekshiruv boshlagan. Agar mutaxassislar zararlovchi moddani aniqlasa, tashkilotchilar jarimaga tortiladi.