Ҳиндистон ва Хитой ўртасида йўл таъмирланиши туфайли келиб чиққан низо бартараф этилди

Ҳиндистон ва Хитой икки ойдан узоқроқ вақт давом этган Ҳимолай тоғларидаги чегара билан боғлиқ тангликни тартибга солди, деб ёзади Meduza.

Бутун шу вақт давомида чегара бўйлаб қўшинлар турган, Хитой эса Ҳиндистонга қатъий чоралар билан таҳдид қилган эди. Низонинг олдини олишга муваффақ бўлишди — ОАВлар ёзишича, бунга Ҳиндистон ҳукуматининг вазмин позицияси, шунингдек, БРИКСнинг навбатдаги саммити яқинлашуви туртки берган.

Ҳиндистон ва Хитой Ҳимолай тоғларидаги чегара туфайли азалдан жанжаллашиб келади. 1962 йилда улар ўртасида бошланган уруш икки ой давом этганди.

Ҳарбий ҳаракатлар бошланишига олиб келишига оз қолган сўнгги воқеа эса 2017 йил июнида Хитой, Ҳиндистон ва Бутан чегаралари кесишган Доклам платоси ҳудудида юз берди. Доклам платоси — Хитой ва Бутан ўртасидаги азалий ҳудудий баҳс мавзуси. 16 июнь куни хитойлик ишчилар платога олиб борадиган йўлни мустаҳкамлашни бошлади, буни эса Бутанда ярашувнинг бузилиши деб ҳисоблашди.

Ҳиндистон низога иттифоқдоши Бутаннинг илтимоси билан аралашди. Ҳиндистон қўшинлари қурилиши ишлари олиб борилишига тўсқинлик қилиш учун баҳсли ҳудудга яқин келди. Улар қурувчиларни сиқиб чиқарди, Хитой бунга жавобан, плато яқинидаги гуруҳини кучайтирди.

Хитой қатъий чоралар кўришга тайёрлигини эълон қилди. Июлда эса Ҳиндистон билан чегара яқинида ҳарбий машғулотларни ўтказди.

18 июндан 28 августгача Ҳиндистон ва Хитой қўшинлари чегара бўйлаб ўрнашиб турди. Ҳиндистон ҳукумати узил-кесил хатти-ҳаракатларни амалга оширмади, Хитой ҳаракатлари ноқонунийлиги ҳақидаги доимий баёнотлар билан чегараланди. Натижада 29 август куни томонлар қўшинларни олиб чиқиб кетиш ҳақида эълон қилди.