Россия махсус хизматлари 1 сентябрда терактлар тайёрлаган ИШИД жангарилари ушланганини маълум қилди. Иккиси ҳам — Марказий Осиё вакиллари

Россия Федерал хавфсизлик хизмати (ФСБ) Москва шаҳри ва вилоятида ИШИД гуруҳининг икки аъзоси ушланганини билдирди. Улар 1 сентябрь куни жамоат жойларида терактлар уюштиришни режалаштиргани аниқланди, деб хабар беради Meduza.

Ушланганларнинг бири ИШИДга қасамёд қилиши акс этган видеони интернетга жойлаштирган.

«Шундан сўнг у совуқ қурол ёрдамида оддий фуқароларга ҳужум уюштиришни режалаштирган», — маълум қилди ФСБ жамоатчилик билан алоқалар маркази.

Иккинчи гумондор 1 сентябрь куни ўзини портлатишни режалаштирган. Тинтув чоғида у унинг уйидан кучли портловчи ускуна ҳамда уни тайёрлашда ишлатилган компонентлар топилди.

Ушланганларнинг иккиси ҳам Марказий Осиё вакилларидир. Улар айнан қайси республикалардан эканлиги ҳозирча маълум қилинмади.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.