Австралиялик Майкл Поуэлл Ла-Манш бўғозини сузиб ўтган олтинчи имконияти чекланган киши бўлди. Брисбенлик 55 ёшли эркакнинг бир оёғи йўқ. У бўғоздаги энг қисқа масофа бўлган 34 километрни сузиб ўтиш учун 15 соат 25 дақиқа керак бўлди. Поуэлл эркин, брасс ва чалқанча усулида сузган. Бу ҳақда «ТАСС» хабар берди.
«Бунга эришиш учун менга икки йил тинимсиз, шу жумладан, бир неча соатлаб океанда ўтган машғулотлар керак бўлди», — деди Поуэлл журналистларга.
Ла-Маншни сузиб ўтишга муваффақ бўлган имконияти чекланган энг машҳур киши франциялик Филипп Крауз ҳисобланади. У қўл ва оёқсиз ҳолатда бу ишни уддалаган биринчи киши ҳисобланади. Крауз махсус протезлар ёрдамида бу масофани забт этган.
Поуэллнинг бу масофани сузиб ўтиши учун бир суткадан кўпроқ вақт кетиши режалаштирилган эди, бироқ у якунда масофани 13 соатда сузиб ўтди.
Имконияти чекланмаган спортчилар ўртасида Ла-Маншни кесиб ўтишда амалдаги рекорд эркаклар учун 6 соат 55 дақиқани, аёллар учун эса бу натижадан бир соат кўпроқни ташкил қилади. Бўғозни сузиб ўтган энг кекса киши 70 ёшли британиялик собиқ жарроҳ Рожер Оллсоп бўлган. У икки қирғоқ орасидаги масофани 18 соатда сузиб ўтган.
Шу вақтгача Франция ва Буюк Британия ўртасидаги масофани 900 дан ортиқ киши сузиб ўтган. Бу ишни биринчи бўлиб 1875 йилда британиялик Метью Уэбб уддалаган. Унинг натижаси 21 соат 41 дақиқани ташкил қилган. 1926 йилда Ла-Маншни биринчи аёл сузиб ўтган. У америкалик Гертруда Эдерле бўлган. Гертруда бўғозни 14 соат 39 дақиқада кесиб ўтган.
Изоҳ (0)