Канадада ресторан мижози ташқи кўриниши осиёлик бўлгани учун ортиқча ҳақ тўлашга мажбур қилинди

Канаданинг Квебек шаҳридаги Aux Anciens Canadiens ресторанида мижознинг чекига унинг ташқи кўриниши осиёлик бўлгани учун ортиқча тўлов ёзилди. Бу ҳақда The Georgia Straight нашри хабар берди.

Келиб чиқиши хитойлик бўлган ва Ванкуверда яшовчи Канада фуқароси Мелвин Паннинг айтишича, ҳодиса август ойининг бошида бўлиб ўтган.

Пан дугонаси билан ресторанда овқатланган. У ҳисобни тўламоқчи бўлганда, унга хизмат кўрсатиш ҳақи қўшилганини кўрган. У умумий ҳисобнинг 15 фоизини ташкил қилган.

Пан бундан ҳайратланган, бироқ кўрсатилган суммани тўлаб, ресторандан чиқиб кетган. Кейинчалик интернет орқали у Aux Anciens Canadiens ресторанида барча мижозлардан шу тариқа ҳақ олинадими ёки йўқлигини билишга қарор қилган.

Пан ресторан сайтида бундай маълумот йўқлигини билгач, ресторанга қайтиб келиб, тушунтириш талаб қилган. Ресторан менежери унга 15 фоизлик тўлов осиёлик, хусусан, хитойлик, япониялик ва Жанубий кореялик меҳмонларнинг ҳисобига автоматик равишда қўшилишини айтган.

Aux Anciens Canadiens ресторани ходимининг айтишича, бундай мамлакатларда чой-чақа бериш одати йўқ. Шунинг учун ресторан шу тариқа официантларга ҳатто осиёлик меҳмонлардан ҳам пул олишни таъминлайди.

Пан ўзининг Канада фуқароси эканлигини тушунтиргач, унга 15 фоизлик тўлов қайтариб берилган.