Avstraliyalik Maykl Pouell La-Mansh bo‘g‘ozini suzib o‘tgan oltinchi imkoniyati cheklangan kishi bo‘ldi. Brisbenlik 55 yoshli erkakning bir oyog‘i yo‘q. U bo‘g‘ozdagi eng qisqa masofa bo‘lgan 34 kilometrni suzib o‘tish uchun 15 soat 25 daqiqa kerak bo‘ldi. Pouell erkin, brass va chalqancha usulida suzgan. Bu haqda “TASS” xabar berdi.
“Bunga erishish uchun menga ikki yil tinimsiz, shu jumladan, bir necha soatlab okeanda o‘tgan mashg‘ulotlar kerak bo‘ldi”, — dedi Pouell jurnalistlarga.
La-Manshni suzib o‘tishga muvaffaq bo‘lgan imkoniyati cheklangan eng mashhur kishi fransiyalik Filipp Krauz hisoblanadi. U qo‘l va oyoqsiz holatda bu ishni uddalagan birinchi kishi hisoblanadi. Krauz maxsus protezlar yordamida bu masofani zabt etgan.
Pouellning bu masofani suzib o‘tishi uchun bir sutkadan ko‘proq vaqt ketishi rejalashtirilgan edi, biroq u yakunda masofani 13 soatda suzib o‘tdi.
Imkoniyati cheklanmagan sportchilar o‘rtasida La-Manshni kesib o‘tishda amaldagi rekord erkaklar uchun 6 soat 55 daqiqani, ayollar uchun esa bu natijadan bir soat ko‘proqni tashkil qiladi. Bo‘g‘ozni suzib o‘tgan eng keksa kishi 70 yoshli britaniyalik sobiq jarroh Rojer Ollsop bo‘lgan. U ikki qirg‘oq orasidagi masofani 18 soatda suzib o‘tgan.
Shu vaqtgacha Fransiya va Buyuk Britaniya o‘rtasidagi masofani 900 dan ortiq kishi suzib o‘tgan. Bu ishni birinchi bo‘lib 1875-yilda britaniyalik Metyu Uebb uddalagan. Uning natijasi 21 soat 41 daqiqani tashkil qilgan. 1926-yilda La-Manshni birinchi ayol suzib o‘tgan. U amerikalik Gertruda Ederle bo‘lgan. Gertruda bo‘g‘ozni 14 soat 39 daqiqada kesib o‘tgan.
Izoh (0)