Путиннинг ўрнига ким президент бўлишини айтган жамоатчи янги ишга ўтди

Россиянинг Афғонистондаги уруш фахрийлари жамоатчилик ташкилоти раиси ўзгарди, деб ёзади «РБК».

Ташкилотни 20 йил бошқарган ва апрель ойида Владимир Путин иштирокидаги мажлисда унинг ўрнини босувчи сифатида Давлат думаси спикери Вячеслав Володин номини тилга олган Андрей Чепурной ўрнига Олег Озёровни танлашди.

Чепурнойнинг ўзи «Уруш фахрийлари»нинг Москва бўлинмаси — «Столица» раҳбарига айланди.

Чепурной айни пайтда жуда йирик фирибгарлик учун тергов остига олинган.

Нашр эслатишича, у 20 апрель куни «Победа» ташкилий қўмитасининг Кремлдаги мажлисида Путинга унинг ташкилоти ва сенатор Клинцевич ўртасидаги низо ҳақида гапириб берганди. Шунингдек, жамоатчи Чепурной Клинцевич унга Путиндан кейин Россия президенти Давлат думаси спикери Вячеслав Володин бўлишини айтганини таъкидлаганди.