Номаълум эркак Букингем саройи яқинида икки нафар полициячига жароҳат етказди

Лондоннинг Букингем саройи яқинида номаълум эркак икки нафар полициячига жароҳат етказди. Бу ҳақда «Интерфакс» хабар берди.

«Икки нафар полициячи Букингем саройи яқинида пичоқ билан қуролланган эркакни ҳибсга олаётган вақтда жароҳат олди», — дейилади хабарда.

Жиноятчи сарой ҳудудига киргунига қадар тўхтатиб қолинган. У оғир тан жароҳати етказиш ва полициячиларга ҳужум уюштиришда гумонланиб ҳибсга олинган. Жароҳат олган полициячилар воқеа жойида қолган.

Букингем саройи вакили хавфсизлик масалалари юзасидан изоҳ беришни истамади.

Саройда қиролича Елизавета II нинг расмий қароргоҳи жойлашган. Маълумотларга кўра, содир бўлган ҳодиса яқинида қироллик оиласи аъзолари бўлмаган.