Брюссель марказида номаълум шахс ҳарбийларга пичоқ билан ҳужум қилди. Ҳодиса теракт дея баҳоланди

25 август, жума куни кечаси пичоқ билан қуролланган эркак Брюссель марказидаги ҳарбий хизматчиларга ҳужум қилди, деб хабар берди «ТАСС».

Маълумотларга кўра, воқеа пойтахт марказидаги Эмиль Жакмен хиёбонида соат 20:15 да содир бўлган. Ҳужум вақтида жиноятчи «Аллоҳу акбар!» дея бақирган. У ҳарбийлардан бирининг юзига, яна бирининг қўлига енгил шикаст етказган.

Жиноятчига нисбатан ўқ узилиб, хавф бартараф этилган. У шифохонага олиб борилгач, ўша ерда вафот этган.

«Тахминимизча, у террорчилик ҳужумини уюштирган», — дея агентлик прокуратура вакилининг сўзларидан парча келтирди.

Ҳужумни уюштирган фуқаронинг шахси аниқланди — у 1987 йилда Сомалида туғилган бўлиб, Брюггеда истиқомат қилган. Илгари у ҳақида полицияда маълумот бўлмаган.