КХДР 26 август, шанба куни эрталаб Япония томонга кичик масофаларга мўлжалланган ракеталарни учирди. Бу ҳақда Yonhap агентлиги Жанубий Корея бирлашган штаб раҳбарлари қўмитасига асосланиб маълум қилди, деб хабар берди «РИА Новости».
Идоранинг хабар беришича, Канвондо провинциясидан учта ракета Япон денгизига қараб учирилган. Шунингдек, Жанубий Корея ҳарбийларининг маълум қилишича, ракеталар 250 километрга яқин масофани босган.
Бундан ташқари Америка ҳарбийлари ҳам Шимолий кореяликлар ракета учирганини аниқлади. Уларнинг маълумотларига кўра, кичик масофага мўлжалланган иккита баллистик ракетанинг учирилиши омадсиз якунланган, ракеталардан яна бири учирилишидан кўп ўтмай туриб портлаб кетган.
Корея яриморолидаги вазият КХДР ва АҚШ ўртасида алмашилган баёнотлардан сўнг кескинлашди. Шимолий Корея Американинг Андерсон авиабазаси ҳамда Апра-Харбор ҳарбий-денгиз базаси жойлашган Гуам оролига ракета учиришга ваъда берди. Ўз навбатида АҚШ президенти Дональд Трамп ҳам КХДР етакчиси Ким Чен Ин «Гуамга бирор нима қилгудек бўлса, Шимолий Корея билан ҳали ҳеч ерда рўй бермаган нохушликлар содир бўлиши»ни ваъда қилди.
Ўтган ҳафтада икки мамлакат етакчилари ўз баёнотларини бироз юмшатди. Ким Чен Ин бир мунча вақт АҚШ хатти-ҳаракатларини кузатишга тайёр эканлигини билдирди, Трамп эса унинг сўзларини маъқуллади. Бироқ 21 август куни АҚШ ва Жанубий Корея КХДРда қуролли можарога тайёргалик дея қабул қилинаётган ўзаро ҳамкорликдаги Ulchi — Freedom Guardian ўқув машғулотларини бошлади.
Изоҳ (0)