Қатар давлат ахборот агентлиги (QNA) тизимини бузишда алоқадорликда айбланган беш нафар кибержиноятчи Туркияда қўлга олинди. Бу ҳақда Al Jazeera’га таяниб, «ТАСС» хабар берди.
«Туркиядаги дўстларимиз беш нафар шахс қўлга олингани ва уларга нисбатан тергов бошлангани ҳақида хабар берди. Қатар прокуратураси туркиялик ҳамкасблари билан ушбу масала бўйича ҳамкорлик қилмоқда», — дея амирлик бош прокурори сўзларидан парча келтирди телеканал.
QNA’га уюштирилган киберҳужум оқибатида агентликнинг расмий сайтида Қатар амири Тамим Бин Ҳамад Ат-Таний Эронни «минтақадаги барқарорликни таъминловчи» дея атагани ва баъзи Яқин Шарқ мамлакатларининг Теҳронга қаршилигини танқид қилгани ҳақида хабар пайдо бўлган эди.
Қатар Ташқи ишлар вазирлигининг расмий саҳифа бузилгани ҳақидаги баёнотига қарамай, 5 июнда Саудия Арабистони, БАА, Баҳрайн ва Миср Қатарни террорчиликни қўллаб-қувватлаш ва ўзларининг ички ишларига аралашишда айблаб, у билан дипломатик муносабатларни узган эди.
Изоҳ (0)