Таниқли адабиётшунос Шуҳрат Ризаев Ўзбекистон Президенти Шавкат Мирзиёевнинг 25 августдаги фармонига мувофиқ «Дўстлик» ордени билан мукофотланди. Бу ҳақда «Ўзбекистон 24» телеканали хабар бермоқда.
Аввалроқ «Ўзбекистон» телеканалидаги «Муносабат» кўрсатуви бошловчиси Қуддус Аъзам «Дўстлик» ордени билан, Ўзбекистон халқ ёзувчиси Тоҳир Малик эса «Меҳнат шуҳрати» ордени билан тақдирлангани ҳақида хабар берилган эди.
Президент фармонида қайд этилишича, улар Ўзбекистон «мустақиллигини мустаҳкамлаш, миллий ғояни ривожлантириш, маънавиятимизни тиклаш, ўзлигимизни англаш йўлида катта ҳисса қўшган, ёрқин истеъдоди ва ижоди, илмий фаолияти, ҳалол хизмати, ёшларни она юртга муҳаббат, истиқлол ғояларига садоқат руҳида соғлом ва баркамол этиб тарбиялаш ҳамда жамоат ишларидаги фаол иштироки учун» мукофотланган.
Тақдирланганларнинг тўлиқ рўйхати билан бу ерда танишиш мумкин.
Мавзуга доир: Президент фармони билан бир қатор ўзбекистонликлар давлат мукофотлари билан тақдирланди
Шуҳрат Ризаев ўз мактубида Президент эътиборига бир неча таклифларни ҳавола қилган бўлиб, улар орасида «кириллни асосий, лотинни иккинчи алифбо сифатида қонунийлаштириш» таклифи ҳам бор эди.
Шуҳрат Ризаевнинг алифбо масаласида Президент Шавкат Мирзиёевга билдирган фикрлари билан тўлиқ қуйида танишишингиз мумкин.
…Шу билан боғлиқ яна бир ўта муҳим ва ғоят оғриқли муаммо бор. Бу — жорий алифбомиз масаласи. Бугун 25 ёшгача бўлган фарзандларимиз лотин алифбоси асосидаги ёзувда савод чиқариб, ундан фойдаланяпти. Катта ёшдаги ҳамюртларимиз эса кирилл ёзувидаги алифбода мутолаа қилади ва иш юритади. Мана, учинчи ўн йиллик тўлиб боряптики, кўпчилик ҳануз лотин ёзувига мослаша олмаётир.Қолаверса, лотин алифбоси, мутахассислар фикрича, тилимиз табиатига унчалик мувофиқ эмас. Бинобарин, у янада такомиллаштиришни тақозо этади. Шу боис оммалашмаётган алифбодан оммавий ахборот воситалари ҳам, нашриётлар ҳам ниҳоятда кам фойдаланяпти. Мактаб ва ўрта махсус ўқув юртлари кутубхоналари лотин ёзувида бўлмаган адабиётларни фондларига олмайди. Натижада — бу кутубхоналар ғарибу қашшоқ, ёшларимиз ёниб тарғиб қилинаётган китобхонлик ва мутолаа маданиятидан бир тош нарида!
Истиқлолимизнинг дастлабки йиллари «Ёш гвардия» ёки «Ўзбекистон ССР» номи билан нашр этилган неки китоб бўлса, у Алишер Навоийми, ё Абдулла Қодирий қаламига мансубми — фарқига бормай маҳв этганлари каби, ундан аввалроқ алифбони уч бора ўзгартириб (араб, лотин, кирилл), халқимизни саводсиз этганларидек жоҳилона иш тутишлар миллатимиз тарихи ва тақдирида хунук ва зарарли из қолдириши тайин.
Сиз маърузангизда «жаҳолат» тушунчасига алоҳида тўхталиб, «… бугунги ҳаётий жараёнлар жаҳолат ҳамма соҳада ҳам учраши, агар унга қарши ўз вақтида кураш олиб борилмаса, ўта оғир оқибатларга олиб келиши мумкинлигини кўрсатмоқда», деб айтдингиз. Шўро давлати алифбо масаласида ана шундай сиёсат юритгани учун, араб, кейинроқ қисқа муддат лотин алифбосида яратилиб, сақланган ёки нашр этилган қанчадан-қанча маънавий-маданий обидалар: қўлёзмалар, ҳужжатлар, газета-журнал, китоблар, ёзишмалар архиву ҳужжатхоналарда ўлик бисот бўлиб ётибди.
Биз ҳам лотиндан кирилл алифбосига ўтилган даврдан то шу кунгача саксон йиллик маданий тарихимизни фарзандларимизга кераксиз бир мулк ўлароқ қолдирмайлик. Фурсат ўтмасидан кириллни — асосий, лотинни иккинчи алифбо сифатида қонунлаштирайлик.
Шуҳрат Ризаев, адабиётшунос
Изоҳ (0)