Энг бой тадбиркорлар жуда кўп китоб ўқийди ва улар ўз муваффақиятлари айнан китоб ўқишга бориб тақалишини таъкидлайди.
Дунёдаги энг йирик тадбиркорлардан ва энг таниқли инвесторлардан бири Уоррен Баффетдан унинг муваффақияти сири ҳақида савол беришганида, у: «Ҳар куни 500 саҳифа китоб ўқинг. Билим омонат пулининг фоизи каби тўпланиб боради. Бу ҳар кимнинг қўлидан келади, аммо буни ҳақиқатда қиладиганлар кам», — дея жавоб берган.
Баффетнинг ўзи инвесторлик карьерасининг бошида кунига 600 дан 1000 саҳифагача китоб ўқиган. Ҳозир ҳам у вақтининг 80 фоизини китоб ўқишга бағишлашга интилади. У бунга қандай эришади, дейсизми? У шунчаки буни бирламчи даражадаги муҳим вазифа деб ҳисоблайди.
Тадбиркор ва жамоат арбоби, Microsoft яратувчиси Билл Гейтс йилига 50 тадан китоб ўқийди. Унинг сўзларига кўра, кўп саёҳат қилиши ва қизиқарли одамлар билан танишишига қарамай, китоб ўқиш унинг учун янги нарсаларни ўрганиш ва ўз дунёқарашини кенгайтиришнинг асосий усули бўлиб қолмоқда. Йўлга отланганида ҳам у ўзи билан китоб олади.
Тадбиркор, ихтирочи ва инвестор Илон Маск, ракета қуриш нархи жуда баланд бўлгани сабабли, уларни қуришни ўзи ўрганишга қарор қилган. Бунинг учун у китоблар ўқиган. У аниқ мақсад сари интилган, муайян билимларга ташна бўлган ва ўзи истаган нарсасини ўрганмагунича, тўхтамаган.
Шундай қилиб, кўп китоб ўқиш учун баъзи масалаҳатлар:
- кутубхонага боринг, бу минглаб китобларни қўлга киритишнинг арзон усули;
- таймер билан ўқинг. Вақтингиз қанча бўлишидан қатъи назар, таймер сизни ўқишга киришиш ва чалғимасликка мажбур қилади;
- китоб доим қўл остингизда бўлсин. Йўлда эса аудиокитобларни тингланг. Ниманидир кутиш вақтида ҳам вақтни бекор ўтказманг;
- уйқу олдидан ўқинг. Биринчидан, уйқу олдидан биз кўпроқ ахборотни ўзлаштирамиз. Иккинчидан, ўқиш ухлашга ёрдам беради. Учинчидан, ҳар куни бир хил вақтда китоб ўқийверсангиз, бу тез орада одат тусига киради;
- ҳеч бўлмаганда учта боб ўқинг: шунда китоб сизга ёққан-ёқмаганлигига амин бўласиз. Учта бобдан сўнг, китоб ёқмаганлигини ҳис қилсангиз, ўқишни тугатинг, кейинги китобга ўтинг.
Изоҳ (0)