1000 долларга 10, 50 ва 100 йил олдин АҚШда нима сотиб олиш мумкин эди?

Инфлация атамасини ва унинг АҚШ долларига таъсирини тушуниш учун иқтисодчи бўлиш шарт эмас. Вақт ўтиши билан маҳсулот ва хизматлар қимматлашиб боради. Инфлацияга яққол мисол сифатида вақт ўтган сари маълум суммага сотиб олиш мумкин бўлган маҳсулот ва хизматларни кўрсатиш мумкин. Forum Daily 1000 долларга АҚШ бозорида 100 йил аввал ва бугунги кунда сотиб олиш мумкин бўлган нарсаларга мисоллар келтирди.

1915 йил, Steinway & Sons Model B фортепианоси

Model B 1915 йилда 1100 долларга сотилган бўлса, бугунги кунда унинг нархи 106 500 долларга баҳоланади.

1915 йил, ўртача седан

Истеъмол нархлари индексига кўра, 1917 йилда машиналарнинг ўртача нархи 1084 доллар бўлган.

1915—1920 йиллар, Sears Greenview

Sears компанияси архивларига кўра, 1915—1920 йилларда шаҳар чеккасида жойлашган тўрт хонали уйни 1152 долларга сотиб олиш мумкин бўлган.

1955 йил, Chanel Flap’нинг 5 та классик сумкаси

1955 йилда бир донаси 220 доллар турган Chanel сумкаси бугунги кунда 4900 долларга сотилмоқда.

1945—1979 йиллар, университетда таълим

Ўша йилларда хусусий университетларда ўқиш нархи 1200 доллар бўлган. Бугунги кунда тўрт йиллик хусусий нотижорат университетда ўқиш, тўловлар, яшаш ва овқатланиш учун бир йилда 45 370 доллар тўлаш керак бўлади.

1966 йил, 25 дюмли Admiral рангли телевизори овоз кучайтириш қурилмаси ва радио билан бирга

1966 йилда америкаликлар учун 995 долларга тушган Admiral рангли телевизори 2017 йилнинг январь ойида 7600 долларга баҳоланган.

1983 йил, Berkshire Hathaway акциялари

Уоррен Баффет ҳар бир акция учун 11,5 доллар тўлаганидан 20 йил ўтмасдан, яъни 1983 йилнинг сентябрида Berkshire Hathaway акцияси 1035 доллар турган. 2017 йилнинг июль ойи охирида инвесторлар компаниянинг бир ҳиссаси учун 259 000 доллар тўлаган.

2007 йил, Apple iMac

2007 йилда Apple томонидан тақдим этилган iMac компьютери 1199 доллардан сотила бошланган. Ҳозирда унинг нархи 1299 долларга тенг.