Акула Таиланднинг Пхукет оролида дам олаётган япониялик сайёҳни тишлаб олди. Бу ҳақда Phuket News нашри хабар берди.
Нашрнинг маълумотларига кўра, ҳодиса 16 август, чоршанба куни юз берган. Кейта Косигоэ қирғоқдан 200 метр узоқликда сёрфинг билан шуғулланаётган вақтда акула унинг чап товонидан тишлаб олган.
Жароҳатланган сайёҳ қуруқликкача мустақил сузиб келишга муваффақ бўлган. Бироқ унинг оёғида йиртқичнинг чуқур тиш излари қолган. Воқеа жойига етиб келган қутқарувчилар 37 ёшли сайёҳга биринчи ёрдам кўрсатган, шундан кейин у касалхонага жойлаштирилган.
Касалхонада шифокорлар билан бирга, Пхукет денгиз биологияси маркази экспертлари ҳам жабрланувчини текширган. Экспертлар хулосасига кўра, сайёҳни қора қанотли риф акуласи тишлаган.
Мутахассисларнинг тушунтиришича, бу акулалар асосан майда балиқлар билан озиқланади ва одамга хавф солмайди. Тахмин қилиншича, акула сайёҳнинг оёғини ўлжа деб ўйлаб, тишлаб олган.
Изоҳ (0)