Гуам ороли маъмурияти Шимолий Корея томондан ядровий ҳужум амалга оширилган вақтда ўзини тутиш бўйича йўриқнома чоп этди. Бу ҳақда АҚШ ОАВларига асосланиб, «Интерфакс» хабар берди.
Жорий ҳафтада Корея марказий телеграф агентлиги Шимолий Корея қуролли кучларининг стратегик қўмондонлиги мутахассислари айни вақтда АҚШнинг Гуамдаги ҳарбий базаларига зарба бериш тезкор режасини жиддий кўриб чиқаётганини маълум қилганди.
Гуам ҳукумати орол губернатори КХДР томонидан билдирилган огоҳлантиришни рад этганига қарамай, қўлланмани чоп этди.
«Чақнаш ёки шарсимон чақмоққа қараманг – у сизни кўр қилиб қўйиши мумкин. Сизни ҳимоя қила оладиган бирор нарса ортига беркининг», — дейилади йўриқномада.
«Радиоактив моддалар тарқалмаслиги учун кийимингизни ечинг. Устки кийимнинг ечилиши 90 фоиз радиоактив материаллардан халос бўлишга ёрдам беради», — деб ёзилган ҳужум вақтида омон қолиш бўйича маслаҳатларда.
Пентагон ўз навбатида Шимолий Кореядаги ракета учириш майдончаларига огоҳлантирувчи зарба беришни кўзда тутувчи махсус режани тайёрлаб қўйган.
Гуам маъмурияти орол Шимолий Корея ракета таҳдидидан ишончли ҳимояланганига ишонтирмоқда.
Гуам губернаторининг ички хавфсизлик бўйича маслаҳатчиси Жорж Чарфауроснинг айтишича, Гуамда жойлаштирилган THAAD ракеталарга қарши мажмуалари Шимолий Корея ракета зарбасидан оролни ҳимоялай олмайди.
Изоҳ (0)