НАТО расмий вакили вазифасини бажарувчи Дилан Уайт 1 август куни Эстония чегараси яқинида Россиянинг МиГ-31 ва Ан-26 самолётларига Испания ҳарбий-ҳаво кучлари қирувчилари ҳамроҳлик қилганини маълум қилди, деб ёзади «РИА Новости». Аммо улар тасодифан Финляндия ҳаво ҳудудига кириб қолди.
Аввалроқ Финляндия ҳарбий муассасаси давлат чегарасини Испания ҲҲКнинг иккита F-18 Hornet қирувчилари бузиб киргани ҳақида хабар берган эди.
Уайт аниқлик киритишича, Испаниянинг иккита F-18 қирувчиси «Эстония ҳаво ҳудуди яқинидаги номаълум ҳарбий ҳаво кемалари»ни тўхтатиб қолиш учун Эстониянинг Эмари авиабазасидан учиб чиққан. Тўхтатиб қолиш учун Финляндия қирувчилари ҳам ҳавога кўтарилган.
«Тўхтатиб қолиш бўйича операцияни Финляндия қирувчиларига топшириш вақтида Испания қирувчилари тасодифан Финляндия ҳаво ҳудудига кирди. НАТО ҳаво қўмондонлиги бўлғуси координацияни яхшилаш учун ҳодисани Финляндия ҳаво операциялари марказига тушунтириб берди», — деди Уайт.
Россия мудофаа вазирлиги МиГ-31 ва Ан-26 самолётлари Болтиқ нейтрал сувлари устида режали ўқув парвозини амалга оширганлигини маълум қилди.
Изоҳ (0)