Hermitage Capital Management директори: Путиннинг бойлиги 200 миллиард долларга тенг

Жефф Безос Amazon акцияларининг қиймати ортгани сабаб Билл Гейтсдан бир суткада олдинга ўтиб, Forbes версияси бўйича дунёнинг энг бой одами дея топилган бир пайтда, Hermitage Capital Management’нинг ижрочи директори Уильям Браудер ушбу унвонни бошқа шахсга — Россия президенти Владимир Путинга берди. Бу ҳақда молиячи Россиянинг президентлик сайловларига аралашуви тахмини юзасидан олиб борилаётган терговда, АҚШ Сенатининг Ҳуқуқий қўмитаси олдидаги чиқишида сўзлади, деб хабар берди Insider Pro.

«Менимча, Владимир Путиннинг бойлиги 200 миллиард доллар туради», — дейди Уильям Браудер.

Браудернинг фонди бир вақтлар Россиядаги энг катта инвесторларидан ҳисобланган, у «Газпром», «Сургутнефтгаз» ва бошқа бир қатор компанияларнинг акцияларига эгалик қилган.

2005 йилда Браудер учун Россияга кириш ёпилган. Молиячининг таъкидлашича, 2003 йилда «ЮКОС» нефть компаниясининг эгаси Михаил Ходорковский ҳибсга олингач, Путин Россиядаги барча олигархларни тўплаган ва фойдани у билан шахсан бўлишишларини таклиф қилган. Браудер биринчи бор 2015 йилда CNN’га берган интервьюсида Путиннинг бойлигини 200 миллиард долларга баҳолаган, бироқ ўшанда ҳам, ундан кейин ҳам бунга исбот келтирмаган.

2007 йилда россиялик сиёсацҳунос Станислав Белковский Путиннинг бойлигини 40 миллиард долларга баҳолаган, шунингдек, унга «Сургутнефтгаз»нинг 37 фоиз акцияси, «Газпром»нинг 4,5 фоиз акцияси ҳамда Швейцариянинг Гунвор нефть трейдерининг камида 50 фоиз акцияси тегишли деган.

Расмий декарацияга кўра, Россия президентининг ўтган йилдаги даромади 8,86 миллион рублни ташкил этган.