24 июль куни хорижий давлатлар ва ҳукуматлар раҳбарлари Ўзбекистон Президенти Шавкат Мирзиёевни туғилган куни билан табриклашда давом этмоқда. Табрик матнлари «Дарё»га ЎзА томонидан тақдим этилди.
Хитой Халқ Республикаси раиси Си Цзиньпин табригида бундай дейилган: «Сизга туғилган кунингиз муносабати билан ўзимнинг самимий табрикларим ва эзгу тилакларимни билдириш менга катта мамнуният бағишлайди».
«Хитой ва Ўзбекистон муносабатларини ривожлантиришга муҳим аҳамият қаратаман, мамлакатларимиз ва халқларимиз фаровонлиги йўлида Хитой билан Ўзбекистон ўртасидаги ҳар томонлама стратегик шерикликни биргаликда ривожлантириш ва мустаҳкамлаш мақсадида Сиз билан яқин ҳамкорликни давом эттиришга тайёрман», — таъкидлади Хитой раҳбари.
Туркманистон президенти Гурбангули Бердимуҳамедов телефон орқали мулоқотда Шавкат Мирзиёевни юбилейи билан самимий муборакбод этиб, эзгу тилаклар изҳор этди, 2017 йилнинг биринчи ярми қардош мамлакатлар ва халқлар ўртасидаги алоқаларни янада мустаҳкамлаш ва ривожлантириш борасида воқеаларга бой ва самарали бўлганини таъкидлади.
Озарбайжон президенти Илҳом Алиевнинг табригида бундай дейилган: «Сизни муҳим сана — 60 йиллик юбилейингиз билан самимий муборакбод этаман ва ўзимнинг эзгу тилакларимни йўллайман».
«Озарбайжон ва Ўзбекистон ўртасидаги ҳамкорлик ва дўстлик маънавий қадриятлари муштарак икки қардош халқнинг хоҳиш-иродасига асосланган. Бугун давлатларимиз ўртасида мустаҳкам асосда йўлга қўйилган муносабатлар алоҳида аҳамиятга эга», — таъкидлади Озарбайжон раҳбари.
Беларусь президенти Александр Лукашенко ҳам ўзбекистонлик ҳамкасбига илиқ табрик сўзларини йўллади:
«Сизни Беларусда фуқаролари ҳар томонлама қўллаб-қувватлайдиган, жонажон мамлакати фаровонлигини таъминлаш, унинг иқтисодий қудрати, халқаро майдондаги обрўсини, жамиятда тинчлик ва тотувликни мустаҳкамлаш учун куч ва имкониятларини аямайдиган тажрибали ва доно давлат арбоби сифатида билади».
Беларусь раҳбари «икки томонлама мулоқотни фаоллаштириш Беларусь ва Ўзбекистон манфаатларига мос келиши ва халқларимиз ўртасидаги анъанавий мустаҳкам дўстлик ва ўзаро англашув асосида серқирра шерикликни янада чуқурлаштиришга хизмат қилиши»га ишонч билдирди.
Украина президенти Пётр Порошенко ўз табригида «Сизнинг раҳбарлигингизда Ўзбекистон Республикасини янада ривожлантириш бўйича ҳаракатлар стратегияси доирасида муваффақиятли амалга оширилаётган ислоҳотлар мустақил Ўзбекистон тараққиётида янги босқич бўлади. Давлатни изчиллик билан модернизация қилиш мамлакатингизнинг халқаро обрўсини янада мустаҳкамлаш ва меҳнаткаш халқингиз фаровонлигини оширишга хизмат қилмоқда», деб таъкидлаган.
Болгария президенти Рамен Радев ўз табригида Ўзбекистон Республикаси Президентини 60 йиллик юбилейи билан самимий табриклаб, эзгу тилакларини йўллади:
«Қулай фурсатдан фойдаланиб, мамлакатларимиз ўртасидаги ҳамкорлик ва анъанавий дўстлик муносабатлари умумий саъй-ҳаракатлар билан халқларимиз фаровонлиги учун янада ривожланиши ва бойишига ишонаман».
Россия ҳукумати раиси Дмитрий Медведев Ўзбекистон раҳбарини 60 ёши билан Россия ҳукумати ва шахсан ўз номидан самимий табриклади:
«Ўзбекистонда Сизнинг раҳбарлигингизда миллий иқтисодиёт салоҳиятини тўлиқ очиб берадиган ва етакчи халқаро шериклар билан ўзаро савдо-иқтисодий ва инвестицион ҳамкорликни сифат жиҳатидан янги даражага олиб чиқадиган кенг кўламли давлат дастурлари ҳаётга татбиқ этилмоқда».
Илгарироқ Шавкат Мирзиёевни Владимир Путин, Нурсултон Назарбоев, Эмомали Раҳмон ва Алмазбек Атамбаев табриклаган эди.
Изоҳ (0)